Føreslår fleire nye næringsområde i Jondal

Tysdag skal styringsgruppa som arbeider med arealdelen av kommuneplanen, drøfta plassering av nye næringsareal. Rådmannen skriv i sakspapira at det har vore særleg vanskeleg å finna eigna areal på Lofthus og i Herand.

– Stadene har knapt med tilgjengeleg areal, og dei areala som kan tenkjast å vera tilgjengelege, ligg slik til at dei enten legg opp til tungtransport gjennom bustadområde eller lengre nye vegar, skriv han.

Han lanserer to alternativ i Herand: Plasset og Samland. Ved Plasset er det best plass og tilgang til veg, og rådmannen skisserer 39 mål. Eit område ved Samland der Folgefonn Entreprenør AS har base, er allereie teke i bruk utan å vera avsett i nokon plan. Rådmannen føreslår å setja av 22 mål her.

Andre område

I Jondal føreslår rådmannen å setja av området med Guntveit sagbruk ved Byrkjeland til næringsområde, og å setja av meir plass til ny aktivitet. Det føreslegne området er 25 mål stort. I tillegg vil han setja av seks mål ved Akkjerhaugen til ny aktivitet knytt til Hardanger House AS.

Ved Torsnes tilrår rådmannen å setja av 34 mål i kommuneplanen til det planlagde smoltanlegget.

Ved Kysnesstrand tilrår han eit område på 38 mål på Vetle Grotnes der det er mogeleg å etablera kai. På Hammaren føreslår rådmannen å setja av eigedomen til Svein Kaptein Hovden til næringsareal for oppføring av båtgarasje. Området vert to mål stort.

Totalt føreslår rådmannen 665 mål nytt næringsareal i 14 område. 166 av dei, om lag ein firedel, ligg i Jondal.

Vekk med camping

Rådmannen tek til orde for å fjerna 56 mål. Ein god del av desse ligg i Jondal. Det eine er eit campingområde ved Hammaren. Rådmannen påpeikar at arealet ligg langt frå sentrum og difor vil vera i strid med vedtekne prinsipp.

I Tryglavik, som tidlegare er sett av til næring i kommuneplanen, føreslår han å ta ut område som er for bratte eller ligg bak ein skrent. Fleire innspel som er komne om å fjerna heile området, vil han ikkje ta omsyn til. Ved Åsleitet i Herand vil han fjerna eit område som har liten verdi av di det ikkje er lovleg å køyra med store køyretøy på fylkesvegen som passerer arealet.

– Ved å ta ut areal som er lite truleg at blir tekne i bruk, syner kommunen at me tek arealplanlegginga på alvor og nyttar dei areala me meiner me treng, skriv rådmannen.

Styringsgruppa skal òg drøfta plassering av område for fritidsbustader, ei sak HF har omtala før. Saka vart nyleg send i retur frå utval for samfunn, plan og næring