Foreldre bygde hytte

Takk vere innsatsen til samarbeidsutvalet og andre foreldre har ei grindverkshytte reist seg i skogen bak barnehagen. Foreldra har både samla inn 77.500 kroner til bygget og delteke i arbeidet med å byggja hytta.

Sjølv om nokre detaljar står att, har bygget vore i bruk sidan i sommar.

– Hytta gjev oss eit fint turmål i området rundt barnehagen. Same kor glad ein er i å vera ute i allslags vêr og vind, er det alltid kjekt å ha ein plass å gå inn og varma seg, seier barnehagestyrar Ann-Kristin Strømme Bråten.

Ho kan ikkje få rosa foreldra nok.

– Heile Bjørketeigen barnehage er under ombygging, og eg har ikkje sjølv hatt kapasitet til å organisera arbeidet. Det aller meste av organiseringa har samarbeidsutvalet teke hand om. Det er fantastisk for ein barnehagestyrar at foreldre engasjerer seg på denne måten, seier ho.

Primus motor

Sjølv om mange foreldre har engasjert seg i hytta, peikar alle på Cato Haaheim Kjosås som hovudmannen i prosjektet. Kjosås fortel at grindverksbygget vart reist heime i løa for om lag eitt år sidan. Arbeidet vart utført av han sjølv, med god hjelp frå svigerfar Harald Kjosås. Etter at tomta var graven ut ved barnehagen, vart bygget plukka frå kvarandre, frakta til barnehagen og reist der med hjelp frå foreldre.

– Grindverk er ein fantastisk byggjeteknikk. Ein av styrkane er at bygga er veldig flyttbare. Det er lett å ta dei frå kvarandre og setja saman att, fortel Kjosås.

Han fortel at han og svigerfaren truleg har brukt om lag 120 timar på hytta. Om ein tek med arbeidet utført av andre foreldre, trur han talet på dugnadstimar nærmar seg 200.

Hytta er laga av gran frå Kjosås og ospekledning frå Rykkje. Den har òg ei rad med vindaugo.

– Vindaugo kom frå eit renoveringsprosjekt heime på garden. Sidan me hadde dei ståande, tenkte eg me kunne bruka dei i hytta, seier Kjosås.

Utviklar teknikken

Kjosås har to born i barnehagen. Det er ikkje den einaste grunnen til at han valde å bruka så mykje tid på hyttebygging.

– Eg ønskjer å læra meir om denne måten å byggja på. For meg var dette ein fin måte å utvikla teknikken på, seier han.

Sjølv om bygget har vore i bruk sidan i sommar, er det framleis ikkje heilt ferdig. Til no har hytta hatt eit provisorisk tak. Bølgjeblikk er kjøpt inn og ligg klart til å monterast så snart høvet byr seg.

Planen er òg å skaffa ein vedomn, slik at born og tilsette kan halda varmen på kalde dagar.

– Er for alle

Cecilie Ailen Johansen er leiar i samarbeidsutvalet for Bjørketeigen barnehage. Ho fortel at parallelt med arbeidet på hytta vart området rundt bygget rydda.

– Det var til og med ein forelder som hadde teke med seg ein stor flisekuttar, slik at me fekk fjerna kratt og småskog. Det har blitt veldig fint der oppe, seier ho.

Hytta ligg på kommunal grunn. Prosjektet har fått støtte både frå Kvam herad, Sparebankstiftinga Hardanger og fleire lokale lag. Bygget er ikkje berre for dei som går i eller arbeider i barnehagen.

– Utanom opningstida vår, er det berre å bruka hytta. Men me ønskjer sjølvsagt at folk tek vare på området og ryddar etter seg, seier Bråten.