Fordeler kroner til festivalar

Dei spørsmåla lyt dei folkevalde stilla seg når ein halv million kroner i tilskot til festivalar skal fordelast etter vinterferien.

Heradsstyret løyvde nemleg den halve millionen utan å seia noko om kriterium for fordelinga. Det administrative framlegget er såleis basert på berre skjøn og synsing. Nokre av festivalane får frå før faste kommunale tilskot.

For seint ute

Seks aktørar har søkt om i alt 647.000 kroner i tilskot. Dei fleste ligg an til å få nesten full utteljing for søknadene. Mest kan gå til Bygdalarm, som har bede om 250.000 og ligg an til å få 240.000 kroner. Pengane skal gå mellom anna til å utvikla ein meir miljøvenleg festival og til ein «festivalskule» for born og unge.

Øystese Næringslag fekk ikkje med seg den rette fristen, og vart såleis for sein med å søkja om stønad til Siderfestivalen i Hardanger. Rådmannen tilrår difor primært å nekta festivalen pengar. Ho legg samstundes fram eit alternativ der festivalen får 90.000 kroner og dei andre får redusert det samla tilskotet tilsvarande.

Rådmannen påpeikar at løyvingane vil både styrkja gamle festivalar og bidra til å skapa nye.

Formannskapet drøftar fordelinga 7. mars, før heradsstyret avgjer 14. mars.

Tilbake med tonar

Fleire av søknadene røper litt om festivalplanane for 2024 som ikkje har vore offentleg kjent før.

Søknaden frå Hardingtonar, som har hatt eitt års pause, røper at festivalstyret under festivalslagordet «Møtast» planlegg mellom anna eit pedagogisk opplegg på skulane knytt til musikken på opningskonserten med Bergen Filharmoniske Orkester fredag 7. juni. Elles står mellom anna Bjørn Tomren, Naboen min, Sjøforsvarets Musikkorps og ein festivalparade på programmet, i tillegg til ein Jon Fosse- og Geirr Tveitt-prega fjordtur med «Epos».

Også 9.–10. mai er Fosse aktuell. Då står mellom andre Fosse-Stiftinga bak fossedagar med musikk, føredrag og skodespel med sceneaktørar som Gabriel Fliflet og Bjørn Wilberg Andersen i Strandebarm. Fleire av dei same arrangørane planlegg ein ny dialektfestival i slutten av september. Mellom bidragsytarane i det førebelse programmet er bjørgvinbiskop Ragnhild Jepsen, lingvist Gunnstein Akselberg og NRK-journalist Øyvor Bakke.

I overgangen mellom mai og juni ventar ei ny utgåve av Bygdapride, denne gongen over tre dagar, i regi av organisasjonen Fargerikt Kvam.