Fordeler granulatkroner
Nye krav til eigarar av kunstgrasbanar kostar. No får dei kommunal hjelp.
600.000 kroner vart i 2023-budsjettet sette av til tiltak for å redusera utslepp av gummigranulat frå banane. Pengane skal hjelpa eigarane av banane, som sjølve har ansvaret for å stetta krava i ureiningsforskrifta.
Då pengane vart lyste ut, søkte tre baneeigarar om stønad. Mest vil rådmannen gje til Norheimsund fotballklubb, som ligg an til å få 343.000 kroner. Pengane skal gå til mellom anna ein mur som styrer brukarane mot éin inngang, til køyre- og gangport, granulatrister, skilt og filterposar ved kummane.
Øystese Fotballklubb skal fiksa gjerdet kring banen, leggja filter i seks kummar og byggja ein kant rundt banen. Også Ålvik skal byggja kant rundt banen, setja opp gjerde med port og få på plass granulatfangarar.
Det vert stilt noko strengare krav til nyare banar. I Kvam gjeld dette berre banen i Øystese, som vart fornya i fjor. Her krevst ein 20 centimeter høg kant i ei eller anna form rundt banen. I Norheimsund er det særleg viktig å få kontroll på granulat om vinteren, meiner rådmannen.
Formannskapet drøftar saka 10. mai, før heradsstyret tek avgjerd 16. mai.
