Forbod mot småviltjakt
I fjellområda i Jondal og omland får ryper og anna småvilt fred frå jegerane i årets jaktsesong.
Lars-Arne Eide, formann i Jondal Felleskasse, opplyser at styra i dei ulike grunneigarlaga saman har vedteke eit forbod mot småviltjakt denne sesongen. Behovet har dukka opp på grunn av minkande bestandar av ryper, skogsfuglar og harar. No ynskjer grunneigarane å gjera noko med saka.
— Me vil gjera det me kan for å få opp att bestanden. Me er ikkje heilt sikre på status per dags dato, men veit at det har vore dårleg det siste året, seier Eide.
Sjølv om grunneigarane under sauesankinga har lagt merke til at bestanden er på veg opp i år samanlikna med fjoråret, vel dei å venta med å opna opp jakt på småvilt.
— Me trur at det vil vera lurt å lata rypene få fred ein sesong, i håp om at bestanden vil auka meir, fortel Eide.
Han tykkjer det er fint at grunneigarane er samde i forbodet, og opplever at dei skapar ein betre fellesskap. No vil småviltet ha større område å opphalda seg i, der det får vera i fred og formeira seg.
Forbodet mot småviltjakt gjeld fjellområda til Vik, Byrkjeland, Torsnes og Jondal.