– For tidleg med slike detaljar
Dei økonomiske vilkåra var ikkje kjende før fylkespolitikarane peika på skuletomta.
HF har stilt fleire spørsmål om kunnskapsgrunnlaget for det samrøystes vedtaket i fylkesutvalet. Dei er stilte til representantar for både dei som argumenterte for og dei som argumenterte mot å velja tomt allereie no.
Mellom anna har me spurt kva partia veit om dei økonomiske vilkåra for å overta den gamle skuletomta, kvar informasjonen kjem frå, kva dei veit om arealtrongen, og kvifor dei vil peika ut tomt utan å vita kostnadene med dei ulike løysingane.
Saksutgreiinga og forprosjektet gjev ikkje svar på desse spørsmåla. Det kan heller ikkje nokon av dei spurde politikarane gje.
Sigrid Brattabø Handegard (Sp), som gjekk i bresjen for å peika ut skuletomta, svarar at spørsmåla om økonomien i alternativet er altfor detaljerte til at ein kan svara på dei no. Slikt må avklarast i hovudprosjektet, i tråd med vanleg prosedyre, meiner ho.
Ho meiner at når Fosse-Stiftinga – og ifylgje stiftinga også Fosse-familien – synest at skuletomta er best, er det rett å visa respekt for synspunkta og spela på lag med dei frivillige kreftene. Handegard opplyser at ho har sett korrespondansen mellom stiftinga og Jon Fosse.
Marthe Hammer (SV) var mellom dei som argumenterte mot, men røysta for vedtaket. Ho meiner mange spørsmål i saka enno manglar svar, men opplyser at SV gjekk med på lokaliseringsvedtaket mellom anna som fylgje av innspela frå Fosse-Stiftinga. Ho trur ein kan ha gjort prosjektet ei bjørneteneste ved ikkje å spørja Kvam herad før avgjerda.
Trude Brosvik (KrF) er overraska over at parti som elles meiner at det er viktig å lytta til kommunane, ikkje var så nøye med det i denne saka. Dette poenget trekte ho fram også i debatten. Til liks med ordførar Torgeir Næss (Ap) i Kvam ottast ho at vedtaket kan gje ein ekstrarunde dersom skuletomta viser seg å vera dyr eller ueigna.
Fylkesvaraordførar Stian Jean Opedal Davies, partifellen til Næss, vedgår at partiet veit lite om nokon av alternativa, men at faktorar som plassering, storleik og infrastruktur talar for skuletomta. Om det viser seg å vera ei dårleg løysing, må andre løysingar vurderast, meiner han.
Han understrekar at Ap i utgangspunktet ynskte å senda forprosjektet på høyring til Kvam herad før valet av tomt, men at eit anna ynske var eit breitt fleirtal.
– Om heradsstyret meiner noko anna, må me sjølvsagt gå i dialog, skriv Davies til HF.
