Folkevalde i Vestland har forståing for at store vegprosjekt blir utsette
Regjeringa har tidlegare varsla at det vil bli kutta i samferdsel i statsbudsjettet for neste år. Etter at budsjettet blei lagt fram torsdag er det klart at Statens vegvesen ikkje kjem til å starte opp nokon store prosjekt i 2023. Fleire folkevalde i Vestland er triste, men forstår prioriteringane.
Budsjettforslaget betyr at dei fire vegprosjekta som Vegvesenet har prioritert høgast for byggjestart i 2023 alle blir sette på vent: E134 Oslofjordforbindinga (Viken), E134 Røldal – Seljestad (Vestland), E6 Megården – Mørsvikbotn (Nordland) og E16 Hylland – Slæen (Vestland).
Heller ikkje veg- og jernbaneprosjektet mellom E16 Arna og Stanghelle (K5) kjem til å bli starta opp i 2023 om budsjettframlegget blir ståande uendra.
– Min umiddelbare kommentar er at dette ikkje var overraskande at det kunne komme ei slik utsetting med tanke på alle signala om at store prosjekt kan måtte vente, seier ordførar Hans-Erik Ringkjøb (Ap) i Voss herad til Bergens Tidende (BT).
– No må vi ikkje setjast fleire år tilbake i tid, utover at vi må ta ein støyt no i ein krevjande økonomisk situasjon, seier Ringkjøb.
Også den lokalt sterkt etterlengta tunnelen mellom Røldal og Seljestad blir utsett i statsbudsjettet.
– Det er dumt, vi veit kor naudsynt den er. Eg er lei meg for det, seier fylkesordførar Jon Askeland (Sp) i Vestland til BT.
Han seier at han forstår prioriteringane til regjeringa og meiner utsettinga er til å leve med.
(©NPK)
