Turløypekartet til dugnadslaget Livoglyst i Øystese vart offisielt opna onsdag 31. mai 2023. Frå venstre: Kari Mostad i Grannehjelpa, ordførar Torgeir Næss og primus motor for prosjektet «Livoglyst», Marit Buttingsrud i Øystese Næringslag.

– Folkehelse på sitt beste

Onsdag kveld inviterte dugnadslaget Livoglyst til offisiell opning av turløypekartet i Øystese. Om ikkje løypene skulle verta ein suksess, så var opninga akkurat det.

Ragnhild Økland Børven
Publisert Sist oppdatert

– Me får håpa det er nok kake til alle, sa primus motor Marit Buttingsrud då opninga nærma seg.

Øystese Skulemusikklag sat klar til å spela, men køen ved kakebordet var lang. Nær åtti personar samla seg utanfor Tunet for å vera med på hendinga.

Om lag halvparten møtte opp ein time før. Då var det mogleg å få prøva ei av løypene saman med ein representant for dugnadsgruppa. HF vart med på turen i «Svartabrualøypa».

Sjå fleire bilete frå opninga nedst i saka.

Turløypekartet i Øystese

• Turløypekartet starta som eit prosjekt i Livoglysti 2019. Målet var skilta lågterskelturar som både lokale og tilreisande kunne ha glede av.

• Livoglyst-gruppa har hatt med seg Øystese Grendautval i prosjektet. Øystese Næringslag har hatt det økonomiske ansvaret.

• Sju turløyper er skilta og med på kartet. Turane, som varierer frå 1,5 til 6,2 kilometer, er rundturar som kan gåast begge vegar.

• Turane er skildra med tekst på baksida av kartet, og det er lett å finna ut om turen kan passa for dei med barnevogn, om turen inneheld bratte parti og om han inneheld til dømes ein rasteplass.

Har fått tilbakemeldingar

Turleiar Oddvar Soldal leia dei 19 personane som hang på trygt oppover langs Øysteseelva, opp mot Meierihola, inn i Svartaskogen, langs vegen frå Steinhus og ned til Mikkjelsflaten og Tunet. På vegen fekk ein ikkje berre høyra om løypa og arbeidet, men også kunnskap og historier om dei ulike stadene.

Oddvar Soldal sytte for at turgåarane fekk meir enn berre mosjon onsdag ettermiddag. Lokalhistorie vart servert i små drypp heile turen. Her ved Svartabrua.

Turkartet er printa i A4-storleik og er til ein- eller tregongsbruk, ifylgje Soldal.

– Viss de finn feil eller anna på kartet, må de seia frå, sa han til deltakarane.

Nokre tilbakemeldingar hadde han fått allereie. Stadnamn som var omtala i forklaringa til turen, var ikkje merkt på kartet, til dømes. Også skrifta på Kvam ungdomsskule og Hardangerbadet, til dømes, var så lita at ho var uleseleg.

– Ein lyt ha meir enn lesebriller, konkluderte turleiaren.

– Det skal alltid lærast noko. Me kan ikkje byrja på topp. Og me kan alltid verta betre, sa Kari Mostad i Grannehjelpa då ho tala til dei frammøtte.

Mostad har vore med i prosjektgruppa.

– Ei bygd på veg opp

Skiltinga og merkinga er folkehelsearbeid på sitt beste, sa ordførar Torgeir Næss då han stod for den offisielle opninga av turkartet. Med ei rydningssaks klipte han ikkje ei snor, men ei grein for å markera at turløypene var opna. Ordføraren meiner løypene og kartet er med på å gjera bygda meir attraktiv, og trur at tiltaka skapar bulyst.

– Øystese er ei bygd der det skjer noko. Ei bygd skikkeleg på veg opp og fram, sa han i opningstalen.

Han understreka at sjølv om både Vestland fylkeskommune og Kvam herad har bidrege til å få realisert tiltaket, så er det den frivillige innsatsen ein verkeleg legg merke til.

– Den er sjølve berebjelken når noko skal gjerast i Øystese, sa Næss.

Ifylgje Buttingsrud har næringslivet i Øystese vore positiv til og bidrege med stort og smått til prosjektet.

Om lag førti personar møtte opp for å «prøvegå» ein tur før opninga. – Dette er ein stor dag, sa Kari Mostad, og skildra kartet som eit «turstihjarte» i sentrum.
Slik ser turløypekartet ut. Kartet er plassert mellom Tunet og Hardangersenteret. Det har ein QR-kode, slik at folk kan finna det på telefonen.
«Svartabrualøypa» går oppover langs Øysteseelva, via Meierihola, Svartebrua og Steinhus, og ned att langs vegen til sentrum.
Denne stien, som går på nedsida av vegen mellom Kvam ungdomsskule og det gamle meieriet, vart laga for nokre år sidan av Leiv Sandven, fortalde Oddvar Soldal.
Kari Mostad (t.v.) og Kristin Andresen Soldal var mellom dei som delte ut kake til dei frammøtte.
Øystese Skulemusikklag sytte for underhaldning til opninga.
Primus motor bak prosjektet er Marit Buttingsrud, men gruppa har hatt med seg Øystese Grendautval, Øystese Næringslag og Grannehjelpa.
– Den frivillige innsatsen er berebjelken når noko skal gjerast i Øystese, sa ordførar Torgeir Næss.
Med ei rydningssaks vart turkartløypa erklært opna.
nyhende kvam herad frivillighet fritid familie og born reiseliv sosiale tilhøve øystese
Laga med Labrador CMS