Folgefonna har svært stor del utanlandske besøkjande
Ei ny undersøking viser at Folgefonna er den nasjonalparken i landet med størst del gjester frå utlandet. Heile 61 ulike nasjonar er registrerte i parken.
Forskarar frå Norsk institutt for naturforsking (NINA) har studert resultata frå brukarundersøkingar i til saman 28 nasjonalparkar i Noreg. Mellom funna er at gjennomsnittsalderen til dei besøkjande varierer frå 37 til 52 år. Det er Lofotodden som trekkjer til seg dei yngste. Nasjonalparkar med yngre besøkjande har gjerne moglegheiter for moderne friluftsaktivitetar, som randonee-toppturar, kiting på ski, surfing og strandaktivitetar.
Høgast snittalder har Gutulia. Det er Noregs minste nasjonalpark og ligg i gamle Hedmark.
Dagsturar
Når det gjeld kor lenge turane varar, vert Folgefonna nasjonalpark trekt fram blant dei som har flest dagsturar.
– I Fulufjellet nasjonalpark er heile 96 prosent av dei besøkjande på dagstur. Fulufjellet har også dei kortaste dagsturane i snitt, på berre tre timar. Denne parken har få turisthytter og ligg samtidig nær store hyttefelt i Trysil. Også Forollhogna, Gutulia, Hallingskarvet, Folgefonna og Jostedalsbreen har mange dagsbesøkjande. Dei to sistnemnde er utprega turistparkar, der dei besøkjande søkjer dagsturattraksjonar knytte til bre og spektakulære landskap, heiter det.
I berre tre av dei 28 nasjonalparkane er majoriteten av dei besøkjande frå utlandet. Nasjonalparkane som har høgast del utanlandske besøkjande, er Jostedalsbreen (75 prosent), Folgefonna (78 prosent) og Lofotodden (78 prosent). Dei same tre parkane har også flest nasjonalitetar blant gjestene, med gjester frå høvesvis 90, 61 og 68 ulike land.
– Kunnskap om kva tilknyting dei besøkjande har til området, er viktig for å utarbeida informasjonsstrategiar om turmoglegheiter, samtidig som naturkvalitetane skal takast vare på. Tidlegare undersøkingar har vist at korleis og på kva språk informasjonen blir presentert, har stor betydning for åtferda til dei utanlandske besøkjande», skriv NINA.
Urbant på fonna
NINA har nytta materialet til å klassifisera nasjonalparkane og gjestene på ein skala frå urbaniserte til villmarksprega. I den mest urbane klassen finn me Jostedalsbreen, Lofotodden og Folgefonna. På den andre enden av skalaen finn me Børgefjell, Varangerhalvøya, Lomsdal-Visten og Femundsmarka.
– I nasjonalparkane som er plasserte i dei mest urbane klassane, må forvaltarane handtera svært store besøksmengder, noko som krev god tilrettelegging og kanalisering av ferdsla nær dei viktigaste innfallsportane, for å sikra god flyt og minst mogleg press på dei mest sårbare områda, vert det konkludert.
