Flytter oppfylging av sjukmelde
Ansvaret for å fylgja opp sjukmelde arbeidstakarar er flytta frå dei lokale Nav-kontora til eit regionalt team.
For sjukmelde arbeidstakarar i Kvam inneber dette at dei vil få oppfylging av kompetente rettleiarar frå andre stader enn Kvam. Hovudmålet med prosjektet er at sjukmelde i regionen skal få like tenester uavhengig av kvar dei bur, opplyser Nav i ei pressemelding.
Færre medarbeidarar vil fylgja opp sjukmelde arbeidstakarar og ha det som heil stilling. Slik trur regionleiar Eirik Verpelstad at Nav får betre kvalitet i arbeidet, og at fleire sjukmeldingar vert kortare enn før.
Minst mogleg fråvær
Oppdraget til Nav er å hjelpa til med å finna løysingar, slik at eit sjukefråvær vert så kort som mogleg.
– Dette er svært viktig, fordi me veit at sjansen for å verta varig ufør aukar mykje når eit sjukefråvær vert langvarig, seier Verpelstad i presseskrivet.
Gjennom den nye måten å jobba med sjukefråvær på trur han at samarbeidet vil verta styrkt.
Dialogmøta vil i hovudsak vera digitale for å spara reising og utslepp. Når det er gode grunnar til å gjennomføra møte fysisk, vil ein gjera det.
Til Kvam etter behov
Medarbeidarane i regionalt sjukefråværsoppfylgingsteam (syfo) er lokaliserte i Ullensvang, Eidfjord, Ulvik og Voss, fortel avdelingsleiar i Nav region Voss og Hardanger, Cathrine Seim-Haugen. Dei har ansvar for sjukefråværet i Kvam òg, og vil vera til stades her etter behov.
Alle sjukmelde i region Voss og Hardanger vil verta kalla inn til digitale dialogmøte.
Nytt er at alle som har vore sjukmelde i 17 veker, vil verta kontakta av ein rettleiar viss dei ikkje er kalla inn til dialogmøte. Målet er å sikra at sjukmelde ikkje går heilt til slutten av sjukefråværet utan kontakt med Nav. Med dette ynskjer ein å koma i gang med arbeidsretta tiltak eller avklaring tidlegare for å hindra lange sjukefråvær.
Arbeidet i oppfylgingsteamet starta 13. november.
