Flyttar til Sandvenhagen

Medeigar i Jan Mo AS, Jostein Mo, fortel at verksemda har vorte samd med eigaren Re Kvam AS om å kjøpa både bygningane og grunnen.

Planen er å flytta kontoret frå brakkene på Mo, der verksemda no held til, og inn i kontorbygget i Sandvenhagen.

– Me har så smått byrja å rydda og flytta våre ting til Sandvenhagen. Me kjem til å ta det litt etter litt. Brakkene på Mo reknar eg med me kjem til å selja, fortel Mo.

Jan Mo har søkt Kvam herad løyve til å halda fram med å bruka Evjo i Øystese til parkering og lagring av stein og grus. Mo seier at sjølv om verksemda no får eit nytt område i Sandvenhagen, kan det vera ein kjem til å halda fram med å bruka Evjo.

– Me får sjå. Men eg reknar med at me på sikt må flytta frå Evjo. Området er regulert til andre føremål, seier han.

Planen har vore at Jan Mo skulle flytta frå Evjo til det nye næringsområde ved Skarpen.

– Skarpen ligg langt fram i tid. Når moglegheita til å kjøpa området i Sandvenhagen dukka opp, valde me å gjera det. Det kan vera aktuelt for oss å bruka ein del av området ved Skarpen. Me får berre sjå, seier Mo.

Han er usikker på om området i Sandvenhagen er stort nok. Verksemda er ikkje framand for å skaffa seg meir areal i nabolaget.

– Det kan vera aktuelt. Me får sjå kva som er mogleg å få til, seier han.

Då HF torsdag snakka med Karstein Bremnes, dagleg leiar i Re Kvam AS, ville han ikkje stadfesta salet. Etter det HF kjenner til vil den formelle overtakinga skje tysdag 7. februar.