Flyttar heim til Herand for å driva butikk
Bergljot Eiken Berg har alltid ynskt å flytta heim att til Herand. Då moglegheita kom, hoppa ho i det. – Det er eit stort steg, seier ho.
Berg er tilsett som ny dagleg leiar for butikken i Herand.
Den nye daglege leiaren håpar å opna butikken til påske. Det er i alle fall planen, fortel ho. Berg har tidlegare jobba i barnehage i over tjue år.
– Eg føler det er litt vågalt, men eg hadde angra veldig om eg ikkje hadde gjort det, seier ho på telefonen frå bykanten.
Fleire vil bidra økonomisk
Laurdag er det kalla inn til ope folkemøte om den nye butikken. Dagens situasjon vil verta lagd fram, heiter det i eit Facebook-innlegg frå Herand Bygdelag. Berg skal presentera seg og planane for butikkdrifta. Det vil òg verta gjort greie for det økonomiske grunnlaget for butikken og behovet for lånekapital.
Ei spørjegransking i oktober synte at eit overveldande fleirtal av fastbuande og hytteeigarar vil ha butikken.
– Eit mindretal, men ganske mange, vil gjerne bidra økonomisk, og mange vil bruka butikken i stor grad, sa Gunnar Dalseth, kontaktperson for bygdelaget til HF.
Berg har etablert eit godt samarbeid med kjeda Snarkjøp Gruppen AS, som butikken framleis vil vera ein del av, og seier at ho kjenner god støtte frå både bygdelaget, kommunen og lokalbefolkninga.
Ein viktig møteplass
Større endringar ser ikkje Berg føre seg. Nokre reolar skal flyttast litt på. Elles skal det vera både vanleg kasse og sjølvbetening. Opningstida er ikkje fastsett, men det vert nokolunde likt det som har vore – ope frå tidleg til seint med bemanning i kjernetida, opplyser ho.
– Det skal vera ein daglegvarebutikk med mjøl og brød og vanlege ting, men me føler det er like viktig å ha ein møteplass som ein handleplass. Dei som vil, skal kunna setja seg ned og ta ein kaffikopp og ein bolle, seier Berg.
– Kva skal de gjera for at butikken skal halda fram over tid?
– Me må jo ha varer – dei rette varene. Og så må me ha bygda med oss, hytteeigarane, turistane og båtturistane, seier Berg.
