Flytande luksus på hardangervisitt

M/Y «Octopus» er namnet på den 126 meter lange og 21 meter breie doningen som passerte kvemmingane og jondølingane i kveldinga. Han kom ifylgje Kystverket frå Bergen og sette kursen mot Eidfjord, der han la seg til ro. Kven som er om bord, må du truleg fram med kikerten for å finna ut.

Superyachten er mellom dei største i verda. Han vart forma av norske Espen Øino og bygd av verftet Lürssen i 2003. Oppdragsgjevar var Microsoft-medgrunnleggjar Paul Allen, som døydde i 2018.

Hans draum var å kombinera utforsking og oppdaging med ein drusteleg livsstil på ein mobil fristad. Båten har vore på tur til ymse fjerne strok på planeten, til dømes til Antarktis. Båten skal i dag vera eigd av den steinrike svenske forretningsmannen Roger Samuelsson. Han er registrert på Caymanøyane i Det karibiske hav.

Om du berre blar opp, kan også du reisa med båten. Truleg kostar det deg finskjorta og vel så det, ettersom dei åtte høgdene rommar mellom anna badebasseng, dansegolv, bibliotek, treningsrom, lydstudio, spa, frisørsalong, barar i fleng og luksuriøse lugarar. Trass storleiken rommar han berre 12 doble lugarar og ein «mastersuite», men til gjengjeld eit mannskap på 45 personar.

Ifylgje Bergens Tidende er leigeprisen minst 25 millionar kroner i veka. Verdien av doningen skal vera tre milliardar kroner.