– Fluktrom er feil fokus

– Det som er endra, er den tryggleikspolitiske konteksten Europa i overskodeleg framtid. Norsk tryggleik er ikkje endra, sa Aslaksen då han 5. april orienterte heradsstyret i Kvam om Sivilforsvaret.

Etter at Russland invaderte Ukraina, har han bruka mykje tid på å svara journalistar, kommunar og urolege innbyggjarar på ei lang rekkje spørsmål om tilfluktsrom.

Aslaksen sa at dersom det hadde oppstått ei krise i Noreg, hadde han bede kvemmingane klargjera ein hybel til han i Kvam. Det er nemleg truleg ein av dei betre stadene å vera i ein slik situasjon, påpeika han.

Ikkje for alle

Korkje varslingsanlegga eller tilfluktsromma er meinte som fullgode vernetiltak i ei krise. På det meste kunne tilfluktsrom, som det i alt finst om lag 20.000 av i Noreg, romma vel halvparten av folket. I dag kan ein ta inn om lag 46 prosent i eitt eller anna privat eller offentleg tilfluktsrom. Det beste er likevel om folk held og klarar seg lengst mogeleg heime, ifylgje Aslaksen.

Aslaksen sa at det er gode grunnar til at det ikkje er kome ut lister over dei private tilfluktsromma i pressa: Dei er ikkje meinte for alle, berre for dei som oppheld seg der når det trengst. Det er dei offentlege som skal gjerast kjende av kommunane om det vert turvande.

Utfordringa er at dersom alle veit kvar romma er, vil altfor mange koma til dei, slik at det ikkje vert plass til alle. Dermed vil folk vera ute når dei i staden burde halda seg inne, ifylgje Aslaksen.

Kvam har ingen offentlege tilfluktsrom. Odda har 1 og Voss har fleire. I alt finst kring 600 slike i landet, 41 av dei i Hordaland. I det tidlegare fylket ligg kring 2.200 private rom, dei fleste i folketette Bergen.

Bakgrunnen for at Aslaksen orienterte politikarane, var at Geir Madsen (SV) tok opp statusen for lokale varslingsanlegg. Han høyrde nemleg ikkje eit pip då det var varsla sirenetest ein dag i vinter.

Noreg har 1.250 såkalla tyfonanlegg, 67 av dei i Hordaland. Mange av dei ligg i Bergen, nokre få ved Odda og ingen i Kvam, opplyste Aslaksen.

Med tanke på folketettleik er nok anlegga greitt plasserte, men det er likevel ikkje sikkert dei er rett plasserte, sa han. Han oppmoda folk om å koma med skriftlege innspel til sivilforsvarsdistriktet om plasseringa. Truleg vil ho verta vurdert i eit nasjonalt perspektiv i samband med ny organisering.

Håpar på ferdigstilling

Sivilforsvaret i Kvam har troppar på 24 fleirfagleg utdanna personar og ein tremannspatrulje med «fagidiotar» som fyrst og fremst er i stand til å påvisa eventuelt radioaktivt nedfall. Kvam har spesialtrena personell som kan handtera krevjande vinter- og høgfjellstilhøve.

Basen til styrken skal flyttast frå Øystese til Norheimsund når den nye brannstasjonen på Mo er klar, truleg før nyttår. Materiell og køyretøy skal då fornyast mellom anna med snøskuterar. Det vert også vurdert å ta inn ekstra brannmateriell. I det store og heile vil beredskapen i Kvam verta høgt prioritert, ifylgje Aslaksen.

Generelt er det ein kjempefordel å koma nær brann- og polititenesta med tanke på den samla beredskapen, samordning og samarbeid, sa han.

Distriktssjefen oppmoda politikarane om å innreia den andre høgda i stasjonen snarast mogeleg. For Sivilforsvaret er det ynskeleg at også denne høgda vert ferdigstilt for å få nok plass til både materiell og ein ny samlingsplass i tråd med lova. Så langt har ikkje heradsstyret løyvt pengar til dette.