Nordmenn og innvandrarar forsynte seg med heilnorsk julemiddag: pinnekjøt, kålrotstappe og poteter.

Fleirkulturell møtestad med pinnekjøt og politisk nisse

Innvandrarar i Kvam fekk bokstavleg tala smaka norske tradisjonar i kyrkja torsdag.

Sigbjørn Linga
Bladstyrar
Publisert

Peparkakehus. Pinnekjøt. Kålrabistappe. Riskrem. Sju sortar. Og til sist prikken over i-en for dei minste: julenissen, med eit gongelag mistenkjeleg likt ordføraren som brått forsvann frå stolen midt i matøkta i kyrkjelydssalen i Norheimsund.

Julefesten som KIA Vest og Vikøy sokneråd skipa til, gav altså gjestene eit breispektra utval av norske juletradisjonar. Festen var ei oppfylging av den ukrainske middagen i det same lokalet i september. Målet til KIA Norge er å hjelpa innvandrarar til å verta integrerte i lokalsamfunnet.

Kristent Interkulturelt Arbeid (KIA)

• Oppretta i 1974.

• Er den største diakonale, frivillige og ideelle organisasjonen innan integrering i Noreg.

• Visjonen er ein fleirkulturell fellesskap i kyrkjelyd og samfunn.

• Arbeider med å skapa arbeidskvalifiserande møteplassar og læringsarenaer for formidling av norsk kultur, språk og samfunnskunnskap. Målet er å gjera innvandrarane til aktive deltakarar i det norske arbeidslivet og samfunnet og gje dei mot og styrke til å bryta ut or sosial kontroll, utanforskap, fattigdom og radikalisering.

• Det meste av arbeidet vert utført av frivillige som vert rettleia av tilsette i seks regionar.

Kjelde: kianorge.no

Snudde om på det

Den gongen inviterte ukrainske flyktningar nordmenn. Torsdag var det nordmenn som bad inn og hadde både ukrainarar og menneske med ei rekkje andre nasjonalitetar på gjestelista. Dei som var tilknytte KIA Vest og Grannehjelpa, var spesielt velkomne.

Kring hundre personar – mellom dei mange som aldri har feira jul og i alle fall aldri har smaka pinnekjøt – benkja seg ved borda. Særleg ukrainarane var framande for å eta lam, fortel regionleiar og kvemming Hallgeir Berge i KIA Vest.

– Veldig kjekt. Eg håpar dette kan verta ein årleg tradisjon. Me har fått mange gode tilbakemeldingar. Kvam er eit satsingsområde for tida, og har teke imot mange flyktningar i år, så det er spanande tider, seier han.

Ukrainarane i Kvam bidrog også denne gongen. Under leiing av Eli S. Tveitane baka dei nemleg julekaker i fleng til samkoma. Tveitane er pådrivar i eit av fleire faste møtepunkt for innvandrarar i Kvam.

Sjå bilete frå arrangementet her:

Edmund Tolo dirigerte og spela med Heims Musikklag.
Mannskoret Laudamus varma opp til den seine konserten i Øystese kyrkje fredag med eit par songar dagen før. Nærast står Lars Gunnar Lundblad.
Hallgeir Berge hjelpte borna med å tenna lys i kyrkja. Her får Jon hjelp, medan Teresa og Josef ventar på tur.
Både nordmenn og innvandrarar var til stades på julefesten.
Hallgeir Berge presenterer desserten: kaker og riskrem.
Hallgeir (t.h.) og Tor Håkon Berge (bak t.v.) serverer marsipankake.
Ei rekkje nasjonalitetar var representerte på julefesten.
Festkaka stod ein etiopiar for.
Julenissen dukka opp og delte ut godteposar til dei yngste. Her får Levi godsaker.
Lucas, trygt plassert på armen til pappa Russom Negasi, får gåve av nissen.

Rikeleg med mat

Nær femti kilo pinnekjøt og to hundre porsjonar var førebudde. Kring hundre deltok, så det var rikeleg med mat, sjølv om også mange nordmenn deltok og forsynte seg. Heims Musikklag og mannskoret Laudamus spela og song fleire nummer for gjestene før dei trekte inn i matsalen. Ein del av musikarane og songarane nytta middagshøvet.

Berge synest det var nett passe med kring hundre frammøtte. På ukrainamiddagen var arrangementet så godt marknadsført at det kanskje vart vel mange til bords, seier han.

Regionleiaren, i lag med bror og prosjektmedarbeidar Tor Håkon Berge i KIA Vest, var innom Vaksenopplæringa for å reklamera for arrangementet tidlegare på dagen. Med seg frå Bergen hadde dei ei svær marsipankake som ein etiopisk flyktning og konditor hadde laga.

Noah svinga seg til tonane frå Heims Musikklag.

– Nokon må gjera det

– Det er fantastisk og imponerande at nokon lagar til slike møteplassar. Det er ikkje for mange av dei. Alle snakkar om at me må verta flinkare til å treffast, men nokon må gjera jobben. Å kopla det til norske juletradisjonar har eg veldig sansen for, seier ordførar og nisse Torgeir Næss.

– Korleis var det å vera nisse?

– Varmt! Eg vart overfallen då eg kom inn. Eg har alltid syntest at det er kjekt å vera nisse, seier Næss-nissen.

Les også:

kia vest sosiale tilhøve frivillighet fritid norheimsund nyhende minoritetar
Laga med Labrador CMS