Fleire vil driva butikken i Ålvik
Nærbutikken i Ålvik kan vera redda.
I vår blei det kjent at Coop Hordaland vil endra driftsforma på Coop Marked-butikken i Ålvik, og gjera den om til ein Matkroken-butikk.
Om ikkje nokon vil driva den nye Matkroken-butikken, står den i fare for å bli lagd ned.
Reaksjonane har vore mange. I september kvesste grendelaget i Ålvik klørne i eit bygdemøte. Men det kan sjå ut som at ålvikarane kan pusta letta ut.
– Seinast til nyttår
20. oktober gjekk søknadsfristen ut for vordande butikkdriftarar, og heldigvis for bebuarane i Ålvik var det fleire av dei.
– Me håper å ha ein ny driftar på plass seinast til nyttår, seier administrerande direktør i Coop Hordaland, Lise Skarpås.
No er det Coop sitt dotterselskap, Norsk Butikkdrift AS, som fører prosessen vidare med intervju. Coop vil driva butikken sjølv til nyttår.
Skarpås seier at alle tilsette på butikken i Ålvik vil få tilbod om å fortsetta i den eventuelle Matkroken-butikken.
– Vil kundane merka store forskjellar om Coop blir til Matkroken?
– Det er vanskeleg å seia no, men Matkroken har eit noko større sortiment enn Coop. Litt meir fridom til å velja.
Les også:
Ikkje håp i Tørvikbygd
Når det gjeld Coopen i Tørvikbygd, er det lite nytt å melda. Den kjem framleis til å bli nedlagd etter nyttår, seier Skarpås.
Dei tilsette vil få tilbod om vidare arbeid i andre butikkar.
Butikken har gått med underskot sidan 2015, og Coop vil ikkje fortsetta drifta, heller ikkje med ny driftsform.
Les også:
