Fleire store nye vegprosjekt blir sette på vent
39,5 milliardar kroner blir foreslåtte til vegprosjekt i statsbudsjettet for 2023, ned 376 millionar kroner frå i år. Fleire store vegprosjekt må vente.
33,4 milliardar kroner går til Statens vegvesen, 6,1 milliardar kroner til Nye vegar og 19,4 millionar kroner til Vegtilsynet.
Vegprosjekta E134 Oslofjordforbindelsen (Viken), E134 Røldal – Seljestad (Vestland), E6 Megården – Mørsvikbotn (Nordland) og E16 Hylland – Slæen (Vestland) blir alle sett på vent.
– Sjølv om nokre av dei store prosjekta ikkje startar opp no, vil det vere midlar til nokre mindre prosjekt. Det er eg glad for. Vi må vere forsiktige med å starte opp for mange prosjekt med tanke på faren for at økonomien kan bli overoppheta, seier samferdselsminister Jon-Ivar Nygård (Ap).
Vegvesenets investeringar blir foreslått reduserte med 2,6 milliardar kroner, ifølgje Statens vegvesen.
– Dette er eit svært stramt budsjett. Vi har hatt ei flat løyving dei siste tre åra, samtidig som prisveksten er høg innanfor drift, vedlikehald og utbygging. Når prisveksten må dekkjast innanfor eksisterande rammer, betyr det lågare aktivitet. Vi skal framleis prioritere å halde vegane opne og trygge, seier vegdirektør Ingrid Dahl Hovland i Vegvesenet.
(©NPK)
