Fleire slepp inn gratis
Frå 1. oktober vart det lettare for dei med følgjekort å nytta Hardangerbadet.
Følgjekort er eit kort kommunane gjev til personar som treng følgje når dei skal delta på kultur- og fritidsarrangement. Den som har følgjekort, kan ta med seg ein valfri person. Fram til 1. oktober måtte følgjet betala billett på Hardangerbadet.
– Mange har etterspurt gratis inngang for følgjet. Hardangerbadet har hatt ein pressa økonomi, og me har ikkje våga å innføra dette tidlegare. No har dei økonomiske rammene blitt litt betre, fortel dagleg leiar i Hardangerbadet AS, Anita Storemark.
Gratis følgje betyr at det vert delt ut fleire gratisbillettar.
– Me tek ein økonomisk risiko når me innfører dette, men me trur samfunnsnytten vil vega opp for dei økonomiske konsekvensane. Dette vil mellom anna betra fritidstilbodet til folk som bur på institusjonar. No kan tilsette vera med utan å måtta betala eigen billett, fortel Storemark.
Følgjekortet kan brukast saman med alle typar billettar.
– I mange badeanlegg fungerer følgjekortet berre når brukaren kjøper einskildbillett. Hos oss slepp følgjepersonen inn gratis også med kundar med klippekort og medlemskort, seier Storemark.
Marit Heidi Seim er medlem i rådet for menneske med nedsett funksjonsevne og eldre.
– Dette er godt nytt. No kan personar som treng hjelp, endeleg bruka Hardangerbadet utan å betala dobbelt. Det burde vore slik frå starten av, men me må vera glade for at det endeleg har skjedd. Me veit at menneske med nedsett funksjonsevne må kjempa ein kamp for å få dei rettane andre tek for gjeve, seier ho.
