Fleire skysselskap får ikkje frakta alle elevar når skulane gjenopnar

Fleire skysselskap går no tilbake til dei vanlege skulerutene dei hadde før koronautbrotet råka Noreg. Mange kommunar og fylke seier dei grunna smitteverntiltaka ikkje har kapasitet til å frakte alle elevane, men NHO meiner det er feil.

– Med dei strenge avstandskrava som gjeld, kan vi berre frakte halvparten så mange som vanleg på kvart transportmiddel. Skyss/Kringom gjekk tilbake til tilnærma vanleg rutetilbod 27. april. Det tyder at alle bussar og sjåførar no er i trafikk, slik at det ikkje er rom for å setje inn ekstrabussar. Ekstrabussar som har vore nytta til 1.–4. trinn dei siste vekene, må no brukast på andre elevar. Det blir difor ingen ekstrabussar for noko trinn, og vi er dermed i ein ekstraordinær situasjon der vi ikkje kan garantere at alle elevar får plass på skolebussen, skriv ruteselskapet Skyss/Kringom, som opererer i Vestland, i ei pressemelding.

Dei oppfordrar reisande som kan komme seg til skulen på annan måte om å gjere det.

Også Møre og Romsdal fylkeskommune peiker på utfordringane med å få frakta alle passasjerane.

– På grunn av smitteverntiltak, vil skulebussane berre ha plass til halvparten av passasjerane dei har til vanleg. Elevane må sitte med ein meters avstand frå kvarandre, på oppmerkte sitte- eller ståplassar, skriv dei i ei pressemelding.

– Vi oppfordrar derfor dei som kan, til å gå eller sykle til skulen. Å bli køyrt av foreldre er ei anna løysing, seier Arild Fuglseth, samferdselsdirektør i Møre og Romsdal fylkeskommune, i meldinga.

NHO Transport reagerer på at mange skiltar med for liten kapasitet til å kunne frakte alle elevane.

– Barna har lovfesta rett til skuleskyss, og det skal medlemmene våre kunne levere. I dag står det ei rekke bussar over heile landet klare til å starte opp. Her må ikkje kommunar og fylke gløyme det lovpålagde ansvaret sitt, seier Jon H. Stordrange i NHO Transport i ei pressemelding.

(©NPK)