Fleire overnattar i Hardanger

Andreas Skogseth, dagleg leiar i Visit Hardangerfjord AS, fortel at det har vore fleire turistar i det Statistisk sentralbyrå (SSB) kallar reiselivsregion Hardangerfjord dette året enn tidlegare. I regionen inngår Kvam, Ulvik, Eidfjord og Ullensvang. Det er ikkje mogleg å henta ut tal for kvar enkelt kommune.

Han hentar tala frå SSB-statistikken over kommersielle overnattingar. Det vil seia at alle overnattingar, både turistar og yrkesreisande, er registrerte. Fritidsreiser dominerer.

I fjor var eit rekordår, men frå januar til og med juli i år har Hardanger hatt ein vekst på 12 prosent frå i fjor, seier Skogseth. Kvinnherad tilhøyrer region Sunnhordland, som har hatt 11 prosent vekst i dei same månadane. For heile Noreg er auken 3 prosent. Naboregionen Sognefjorden, som er ein tilsvarande destinasjon med liknande attraksjonar, har 3 prosent auke. Oslo har 4, Bergen 8 og Voss 8 prosent auke. Tala for august er ikkje klare.

– Hardanger gjer det best av alle regionar på Vestlandet. Eg har sjekka regionar frå Rogaland til Møre, men har ikkje klart å finna nokon andre som har gjort det så sterkt. Hardanger er ein attraktiv stad som folk vil besøka. Det er kjekt å sjå, seier Skogseth.

– Har mista kontrollen

Ifylgje Skogseth er naturen hovudårsaka til at folk ynskjer å vitja Hardanger. Dei siste åra har lokal siderproduksjon freista mange til eit besøk. I tillegg er det mange andre ikon her, som andre ikkje har, fortel han. Andre destinasjonar har òg mykje fint å visa fram, så Skogseth meiner Hardanger stikk seg ut i godt selskap.

Lofoten gjer det betre enn Hardanger, og har heile 17 prosent auke i kommersielle overnattingar frå januar til juli i år. Det kan by på problem.

– I Nord-Noreg har det vore så mykje besøk at dei til tider har mista kontrollen. Det har vore mykje skriveri om ukontrollerte mengder villcamping. Me har sett dei same tendensane i Hardanger, og må sørgja for å ha ein strategi for å handtera og forvalta turismen, seier Skogseth.

Jobben med å handtera turismen er allereie i gang. Sidan pandemien har Kvam, Ulvik, Eidfjord, Ullensvang og Kvinnherad samarbeidd om å laga ein reiselivsstrategi for regionen. Skogseth fortel at det er jobba med eit omfattande forprosjekt, og at hovudprosjektet snart skal i gang. Målet er å finna fram til ei berekraftig utvikling som gjev regionen lokal verdiskaping og til slutt ei berekraftssertifisering, opplyser Skogseth.

– Den sterkaste veksten

Visit Hardangerfjord jobbar med å auka lengda på opphaldet til gjestene, slik at turistane vert verande i regionen i fleire dagar. Målet er at dei tilreisande skal gje meir lokal verdiskaping ved å mellom anna nytta lokale hotell, handla på lokale sidergardar og vera med på ribbturar.

Kva gjestene ynskjer å sjå, seier ikkje tala noko om. Skogseth fortel at Visit Hardangerfjord hentar inn tal frå ulike aktørar, til dømes kor mange som vitjar Trolltunga. Av reiselivsattraksjonane i Hardanger er naturbaserte opplevingar populære. Men på grunn av vêret i år trur ikkje Skogseth at det er her ein finn auken.

– Det har vore rekorddårleg vêr i sommar, men trass i det har me klart å skapa eit rekordår så langt, seier Skogseth.

Isolert sett hadde juli heile 14 prosent auke mot same månad i fjor.

– Eg torer å påstå at det er den sterkaste veksten månad for månad i Hardanger nokon gong. Eg kan iallfall ikkje hugsa noko betre, seier Skogseth.

Fleire asiatar og amerikanarar

Etter pandemien forsvann nær sagt alle turistar frå Asia. I år har dei byrja koma attende, seier Skogseth. Det er høg prosentvis vekst blant asiatar, men om ein samanliknar med reisande frå andre stader, er talet lågt. 56 prosent av dei kommersielle overnattingane i regionen kjem frå Noreg. Dei resterande 44 prosentane kjem frå utlandet. Det er flest frå Europa, men det er òg god vekst frå USA, viser tala frå Statistisk sentralbyrå.

– Det er veldig store endringar i reiselivet frå år til år, spesielt etter covid. Det er ei hyggjeleg utvikling at me har fleire kortreiste gjester, seier Skogseth.

Visit Hardangerfjord jobbar målretta med å posisjonera destinasjon Hardanger som eit godt reisemål i inn- og utland. Ifylgje Skogseth er Hardanger ein sesongprega destinasjon. Difor vert det fokusert på å spreia sesongen utover året.

Tala for kommersielle overnattingar tek ikkje med Airbnb-overnattingar. Desse er ifylgje Skogseth i sterk vekst i regionen. Basert på analysane Skogseth har tilgang til, er det nesten ei dobling av talet på Airbnb-overnattingar. Denne typen overnatting er mest populært i Odda og Eidfjord, men byrjar ta seg opp i Kvam og Ulvik, seier han.

– Me ventar vidare vekst, og følgjer med for å finna ut korleis me skal jobba med dette. Airbnb-marknaden medfører endringar for reiselivet. Det må me ha ein strategi for, seier Skogseth.