Fleire må feira jul i isolasjon
Julefeiring i isolasjon vart realitet for fleire. Både Kvam herad og Ullensvang kommune har nye smitta.
Sundag 19. desember melde Kvam herad om at åtte nye tilfelle var påviste frå fredag til sundag. Frå måndag til torsdag er fem nye tilfelle stadfesta. Ein av dei smitta er på besøk i Kvam.
— To til har testa positivt på hurtigtest og ventar svar på PCR-test, fortel ordførar Torgeir Næss (Ap) til HF veslejulaftan.
Omikronvarianten av koronaviruset er påvist lokalt, men det er ikkje kome meldingar om at den nye varianten er påvist i barnehagar eller skular.
— Ein av dei positive hurtigtestane gjeld ein elev på 9. trinn på Kvam ungdomsskule, og elevane på trinnet vert testa som nærkontaktar i dag. Ein av dei stadfesta smitta er tilsett ved same skule. Sidan skulane i Kvam har juleferie, er det ikkje aktuelt med nye tiltak utover testing av nærkontaktar, skriv Kvam herad på den kommunale heimesida torsdag.
Måndag melde Ullensvang kommune om to nye smitta førre fredag, og ein ny smitta måndag 20. desember. Onsdag denne veka vart det meldt om fire nye tilfelle. I alt er sju personar smitta og sit i isolasjon.
