Fleire ladepunkt er på veg

Det kjem fram i ein leigeavtale mellom Kvam herad, som er grunneigar, og kraftselskapet. Ladepunkta skal plasserast på parkeringa ved Spar-butikken, i enden mot Esso-stasjonen. Ifylgje avtalen er føremålet med etableringa å stimulera til auka elektrifisering av transportsektoren, ved å laga eit nettverk av attraktive hurtigladeplassar.

Alle kostnader med etablering og drift vert dekte av Eviny, som òg skal betala heradet 600 kroner i månaden per ladeplass. Avtalen gjeld for ti år og vert automatisk lengd med fem år av gongen.

Lars Furhovde i Eviny leier prosjektet. Han seier at kraftverket lyt setja opp ein ny nettstasjon før ladepunkta kan etablerast. Kor lang tid det vil ta, er uvisst.

– Det kan fort ta tre til fire månader. Ladepunkta er nok ikkje på plass før utpå hausten eller nærare jul, seier han.