– Fleire kunne nok ha søkt
Over halvannan million kroner vil stå att når straumstønaden til næringslivet for andre halvår i fjor er fordelt.
Politikarane sette nemleg av ei ramme på 2,5 millionar kroner til føremålet i 2023-budsjettet. Så stor var trongen tilsynelatande ikkje. Når fordelinga kjem opp politisk denne månaden, føreslår rådmannen å dela ut 986.296 kroner.
– Fleire bedrifter kunne ha søkt. Formannskapet kan eventuelt vedta ei ny utlysing av midlane som enno ikkje er nytta, 1.513.704 kroner, skriv rådmannen.
Føresetnaden for å få tilskot er at prisen har vore over éi krone per kilowattime (kWh) eksklusiv meirverdiavgift, og at kostnadene fører til at bedrifta går med underskot.
Stønadssummen er maksimalt 250.000 kroner per verksemd. Alle som har søkt, har levert tilfredstillande dokumentasjon, meiner rådmannen.
AS Kvam Fjellheisar ligg an til å få 250.000 kroner, sjølv om det ikkje vart bruka så mykje før jul. Skitrekk kunne nemleg søkja om stønad til inneverande sesong dersom kostnadene har vore over éi krone per kWh eksklusiv meirverdiavgift.
Løyvingane gjeld ikkje dei som har fått stønad etter statleg ordning.
