Fleire gratis-grep på veg: – Skjønnar at folk er urolege

– Dette er universelle velferdsgode som gjeld alle, men eg håpar det avlastar dei som slit mest. Eg er fullt ut klar over at for dei som i utgangspunktet hadde ein trong økonomi, så er dyrare mat særleg ei utfordring. Du skal fylle handlekorga til deg og familien din, seier statsminister Jonas Gahr Støre til NTB

Hausten i fjor vil bli hugsa for rekordhøge straumprisar og ei dyrtid under oppsegling.

No rustar regjeringa seg for ein ny haust – med stigande renter og ein kraftig prisauke.

– Eg skjønner at folk er urolege, seier Støre.

Nye grep

Statsministeren trekkjer fram fleire grep frå regjeringa som trer i kraft 1. august, og som kan bidra positivt inn i folks privatøkonomi:

• Barnehage blir gratis frå tredje barnet for foreldre som har fleire barn i barnehagen samtidig. Det vil gjelde rundt 3000 barn. I tillegg blir det innført gratis barnehage for alle i Finnmark og Nord-Troms, noko som gjeld rundt 4000 barn.

• Ordninga med 12 timar gratis SFO blir utvida til å gjelde for andreklassingar. Dette gjeld for 60.000 elevar.

• Studiestøtta blir auka med 7 prosent for skuleåret 2023–2024.

Frå 1. september blir straumstøtteordninga endra slik at ho blir berekna for kvar time. Det betyr at han treffer meir presist og tek betre høgd for svingingar i straumprisen gjennom døgnet.

I tillegg innførte regjeringa og budsjettpartnar SV fleire grep frå 1. juli: mellom anna ungdomsgaranti, auka sosialhjelpssatsar og 200 kroner meir i månaden i barnetrygd for barn over 6 år.

Støre har sjølv merka prishoppet

Statsministeren seier at prioriteten til regjeringa nummer éin er å få prisstiginga ned.

– Eg trur vi har sett toppen no, og at vi kan komme oss ned. Det vil også kunne bidra til at rentebanen fortset oppover for lenge, seier Støre.

– Har du sjølv merka noko til at matvarene har vorte dyrare?

– Eg har jo ikkje ein heilt normal kvardag som statsminister, og eg får god lønn for jobben. Men eg ser jo at mjølk, oppvaskmiddel og andre hushaldsartiklar blir dyrare, seier Støre.

Han påpeikar at det er verre for folk med vanleg lønn som i mange tilfelle får ei prisstigning som er høgare enn lønnsveksten.

– Det grip rett inn i familieøkonomien og er krevjande, seier Støre.

Håpar å unngå

Spolar vi eitt år tilbake, var straumprisane det altoverskyggjande temaet i norsk politikk. Kraftmagasina hadde attpåtil svært låg vasstand. No håpar Støre det blir betre i år.

– På dette tidspunktet i fjor hadde vi jo ei reell uvisse for om det måtte innførast rasjonering. Den siste oppdateringa eg fekk frå olje- og energiministeren, er at fyllingsgrada er på eit godt nivå, seier Støre.

Han påpeikar også at europeiske land har fylt opp gasslagera sine, noko som igjen kan vere med å påverke straumprisane.

– Europa er betre førebudd, men det er framleis ein sårbar situasjon. Vi må følgje den dag for dag, seier statsministeren.

Ny ordning

Regjeringas hovudløysing på straumpriskrisa har vore ei straumstøtteordning. Frå 1. august dekkjer den 90 prosent av kostnaden over 70 øre kvar time straumen kostar over 70 øre per kWh.

Den gamle ordninga nytta ein gjennomsnittspris for heile månaden for å berekne støtta, noko som kunne slå uheldig ut i periodar med ekstreme straumprisar.

Regjeringa har sagt at ordninga skal vare ut 2024.

– Kor lenge ser du for deg at ein skal halde fram med den ordninga?

– Vi har jo sagt at støtta skal vare så lenge dette er ei utfordring og ei belastning for hushalda. Så får vi vurdere dette fortløpande.

(©NPK)