Fleire fjellovergangar opne

Fleire av fjellovergangane er torsdag morgon opne, men vegtrafikksentralen ber bilistane halde seg oppdatert på vêr- og føreforholda.

Dersom du har planar om å køyre over ein av fjellovergangane torsdag, bør du halde deg oppdatert på trafikkinformasjon, vêr- og føreforhold, melder Statens vegvesen.

Ved 8.30-tida melder Vegtrafikksentralen Vest at fylkesveg 53 Årdal – Tyin og riksveg 13 over Vikafjellet er stengde. På sistnemnde veg vil det bli gjort ny vurdering klokka 12.

Desse fjellovergangane er opne:

* E16 Filefjell

* Riksveg 52 Hemsedalsfjellet

* Fylkesveg 50 Hol-Aurland

* E 134 Haukelifjell

På riksveg 7 Hardangervidda er det kolonnekøyring, som ifølgje NAF er noko av det mest krevjande du kan oppleve som bilist.

– Sikta er dårleg, føret er utfordrande, og mange har ikkje erfaring med å køyre på denne måten. Køyr mjukt og med jamn fart, og pass på at du har augekontakt med bilen framfor, seier rådgivar Jan Harry Svendsen i Naf i ei pressemelding.

Han minner om at ventetida kan bli lang før ein blir leidd over fjellet, og at varme klede, mat og drikke derfor er viktig utstyr å ha med seg i bilen. Samtidig må du passe på at du har så full tank eller batteri som mogleg.

– Ta på deg varme klede og send kald luft opp på frontruta når du køyrer i kolonne. Brukar du varm luft kan du risikere isdanning på frontruta om det er minusgrader ute. I tillegg bør du ha tåkelysa framme og bak tent og køyre med varsellys, seier Svendsen.

(©NPK)