Fleire er utan arbeid
59 personar, eller 1,4 prosent av arbeidsstyrken, var heilt arbeidsledige i Kvam i desember. 18 fleire var ledige i år enn i fjor.
I Ullensvang var 2 prosent, eller 113 personar, utan arbeid. Det er 40 fleire enn i 2023.
Det går fram av ei pressemelding frå Nav Vestland.
Prosentvis var Ulvik verst stilt, med 4 prosent ledige. Det er likevel berre snakk om 22 personar. I heile Vestland var 1,8 prosent ledige.
Når det gjeld delvis ledige, var det 37 slike i Kvam i desember. Dei utgjer 0,9 prosent. I Ullensvang var tala høvesvis 25 og 0,4 prosent.
Av dei som er fordrivne frå Ukraina og mellom 20 og 66 år, er 28 prosent i arbeid i Vestland.
– Det er som venta at fleire i denne gruppa kjem seg i arbeid etter kvart som dei er ferdige med introduksjonsprogrammet. Dei med lengst opphald har høgare jobbdeltaking enn nye. Blant dei som kom i 2022 er 42 prosent i arbeid, seier fylkesdirektør Bjarte Hysing-Olsen i Nav Vestland i pressemeldinga.
