Fleire enn halvparten køyrde for fort
Det viste ei måling i den nye 30-sona i Fitjadalsvegen i Øystese.
Frå 13. til 24. november utførte teknisk eining i Kvam herad målinga. Tavla var plassert på ein stolpe på høgre sida av vegen oppover mot Fitjadalen.
Tidlegare hadde vegen fartsgrense på 50 kilometer i timen, men i haust vart grensa sett ned til 30.
Totalt 6.153 køyretøy passerte. Det gjev ein årsdøgertrafikk på 559 køyretøy. Gjennomsnittsfarten på køyretøya oppover vegen var 28 kilometer i timen, medan han nedover var 32 kilometer i timen.
Den høgaste farten oppover vart målt til 77 kilometer i timen, medan den høgaste farten den andre vegen var 61 kilometer i timen. Totalt 3.496 køyretøy køyrde over fartsgrensa, syner rapporten. Dei utgjer 56,8 prosent av trafikken.
Tavla registrerer alle objekt med fart på over 15 kilometer i timen. Ho registrerer trafikk i begge retningar, og har fartsdempande effekt ved at ho lyser opp med den reelle farten til køyretøya i sanntid. I rapporten står det at målingane syner at køyretøya som får tilbakemelding om farten, held vesentleg lågare fart enn dei som ikkje får slik respons.
På grunn av plasseringa fanga målaren også opp trafikk langs gang- og sykkelvegen. Dette kan forklara noko av grunnen til at gjennomsnittsfarten er såpass låg, trass i at meir enn halvparten av trafikken går over fartsgrensa, heiter det i rapporten.
Dei fleste som braut fartsgrensa, køyrde i mellom 30 og 40 kilometer i timen. Av dei som køyrde mellom 40 og 50, var det dobbelt så mange som køyrde nedover som oppover.
Les også:
