Fleire cruisevisittar enn nokon gong
Laurdag 9. april startar cruisesesongen for alvor i Hardangerfjorden.
Det er venta heile 143 cruiseanløp i fjorden i år.
– Ein formidabel rekord, skriv Helge Møller i Cruise Destination Hardangerfjord i ei pressemelding.
Han meiner høgdepunktet kanskje vert eit besøk av skipet «Disney Magic» med Mikke Mus om bord 8. september. Skipet ligg i Eidfjord i ti timar, og Mikke kjem heilt sikkert i land, lovar Møller.
Med 96 anløp og opptil 216.000 passasjerar har Eidfjord mykje å gle seg til etter to magre pandemiår. 17 skip kjem til bygda for fyrste gong. I Rosendal vert det 37 anløp og 27.000 passasjerar. Etter fleire dårlege år i Ulvik er det i år klart for 10 anløp der.
Noko av grunnen til trafikkauken er at fleire cruise har vorte omdirigerte frå Austersjøen til Vest-Noreg. Fleire passasjerar ynskjer ikkje å feriera nær krigshandlingane i Ukraina, og når St. Petersburg vert kutta ut av ruta, er cruisa mindre interessante for mange.
Også drivstoffprisane påvrkar seglingsplanane. Det er grunnen til at nokre selskap føretrekkjer Rosendal framom Ulvik og Eidfjord.
Neste år er det alt notert 118 anløp i fjorden, og 54 i 2024. Reiarlaga melder om rekord i tingingar dei neste åra; folk vil no feriera utanlands etter fleire år i isolasjon og smittefare, skriv Møller.
