Fjord1 og Statens vegvesen signerte kontrakt om sjølvgåande ferjer over Sognefjorden
Reiarlaget Fjord1 og Statens vegvesen har signert kontrakt om drift av riksvegferjesambandet E39 Lavik-Oppedal over Sognefjorden. Dette blir det første ferjesambandet med sjølvgåande ferjer.
Fjord1 skal drifte sambandet med fire fartøy frå 2026 til 2034, med moglegheit for forlenging i inntil tre år.
Kontrakten inneber utvikling av heilautomatiserte løysingar for alle dei fire ferjene frå og med 2027 og ut perioden.
Artikkelen held fram under annonsen.
Kontrakten skildrar 23 ulike funksjonar som skal automatiserast, og summen av desse funksjonane blir at ferjene vil utføre ruteproduksjon av seg sjølv.
Det skal i tillegg etablerast eit kontrollsenter på land, for overvaking og moglegheit til fjernstyring av ferjene.
Administrerande direktør i Fjord1, Dagfinn Neteland er glad for at avtalen no er signert, og ser fram til å utvikle ny verdsleiande teknologi med heilautonome ferjer.
– Dette er eit nytt steg i retning auka automatisering innan maritim sektor, og det ligg sjølvsagt høge forventningar og prestisje i ein slik kontrakt. Her kan overføringsverdien med ny teknologi til andre delar av sjøfartsnæringa bli stor på sikt, seier Neteland.
(©NPK)
