– Fjellstrandkai er best eigna
Ekstraferja i Jondal–Tørvikbygd-sambandet bør bruka kortast mogleg tid til og frå liggjekaien. Kvar kaien skal vera, er enno ikkje fastsett.
Det påpeikar Fjord1 i eit skriv til rådmannen i Kvam. Heradet har på si side vurdert eigne kaiar på oppmoding frå reiarlaget. Rådmannen meiner ikkje nokon av desse er eigna for ei ferje av den storleiken som Fjord1 vil nytta i sommar.
Den kommunale kaien i Øystese er det mest nærliggjande alternativet, skriv rådmannen. Men denne er mykje nytta om sommaren og ligg i tilknyting til ei offentleg badestrand. I tillegg vil ferja her strekkja seg ut over lengda på den kommunale kaien og samstundes okkupera strandlina til tre tilgrensande bustadeigedomar. Bruken av kaien vil såleis fort koma i konflikt med private strandrettar, påpeikar rådmannen.
Etter det heradet kjenner til, vil dimed anlegget til verftet Fjellstrand AS vera best eigna, skriv rådmannen i tilbakemeldinga til ferjeoperatøren.
Regionleiar i Fjord1, Tor Kristoffersen, opplyser til HF at det framleis vert jobba med ulike kaialternativ, og at ingenting er avklara så langt.
