Festar turruter i Herand til kartet

Tysdag 4. oktober drøftar utval for samfunn, plan og næring kartlegginga og verdsetjinga av friluftsområde i Ullensvang. Tilrådinga er å festa eit par hundre ferdsleårer til kartet.

Dokumenta skal vera avgjerdsgrunnlag i arealdelen av kommuneplanen, og gjev føringar for mellom anna plassering av bustad- og hytteområde, men dei er ikkje juridisk bindande.

Utvalet sende dokumenta på høyring i fire veker i september i fjor. 25 innspel kom, fleire av dei frå Herand. Ingen kom frå Jondal.

Fleire innspel gjeld utbetring av stien til Samlen i Herand og bygging av ny parkeringsplass ved fylkesvegen. Rådmannen tilrår å ta tiltaket inn på tiltakslista med prioritet 2. Skalaen går frå prioritet 1 til 3. Rådmannen presiserer at tiltak som parkeringsplass og toalett kan vera avhengige av andre planar, til dømes kommuneplanen. Prioritet 2 får også utviding av skiløypa i Herand med ei sløyfe ved Fodnastøl, eit tiltak Herand Idrettslag har teke på seg ansvaret for.

Dei tre høgast prioriterte tiltaka som er tilrådde, er skilting i Røldal, grunneigaravtalar og skilting ved punkta der turrutene startar.

Tiltaka i planen, alt frå merking til tyngre tilrettelegging av turvegar, føreset løyve frå grunneigarane. Slik løyve ligg ikkje føre for alle årane, men rådmannen vil prioritera å få grunneigaravtalar på plass når tiltak skal utførast.

Kommunen har fått 120.000 kroner i fylkeskommunalt tilskot til prosjektet.

Kommunestyret avgjer saka 20. oktober.