Ferjestenging får følgjer

Ferjesambandet mellom Jondal og Tørvikbygd vert stengt frå tysdag 2. til og med sundag 14. juni. Stenginga skuldast arbeid med nye ferjebruer.

– Det er klart at dette får konsekvensar for reiselivet i Jondal, og kjem i tillegg til pandemien, seier dagleg leiar ved Jondal turistinformasjon i Juklafjord, Åsmund Bakke.

Michael Iversen er dagleg leiar ved Visitfonna AS. Med dei store snømengdene på Folgefonna er det duka for ein god og lang sesong.

Iversen synest heller ikkje særleg om at ferja mellom Jondal og Tørvikbygd tek pause to veker i juni.

– Dei kunne gjort det tidlegare. Det er litt dumt å gjera arbeidet når folk skal ut og reisa og stå på ski, seier Iversen.

– Ironisk nok er konsekvensen truleg mindre på grunn av pandemien, fordi det er færre turistar i juni i år enn elles, seier Bakke.

– Me såg helst at arbeidet hadde skjedd om vinteren. På den andre sida har me full respekt for at dette er eit naudsynt arbeid som må utførast. Prosjektet har si tidslinje, seier breførar Bakke.

Glade for opprusting

Bakke og medarbeidarane er glade for at kapasiteten til ferjesambandet vert betre. Dette kjem reiselivet og lokalbefolkninga til gode.

– Me hugsar godt nokre år tilbake, då ein ofte måtte stå over ei ferje for å koma med, og er svært glade for at me no har fått ei moderne og flott nullutsleppsferje, seier Bakke.

– Dei som veit kor fantastisk det er i Jondal og på Folgefonna på denne tida av året, kvir seg nok ikkje for ein litt lengre veg. Me ser også at mange norske turistar nyttar turistvegen frå Utne, særleg no når det er bløming, men det er klart at nokre kjem nok ikkje til å koma til Jondal på grunn av dette, seier Bakke.

På turistinformasjonen er det fem–seks tilsette gjennom sommaren. På Folgefonna er det normalt litt over tjue breførarar innom i løpet av sesongen frå april til oktober. Bakke har avlyst alle turar på breen fram til midten av juni.

Går glipp av skiturar

– Me skulle eigentleg hatt eit par hundre turistar med oss på Folgefonna på langs på fjellski frå Jondal til Rosendal, og på dagsturar på truger langs Glacier Road. Men DNT-hyttene Holmaskjer og Fonnabu, som me normalt bur på når me går Folgefonna på langs, har vore stengde, i tillegg til at koronareglane har gjort at me ikkje har kunna hatt grupper med oss på tur. Så alt har vorte avlyst, men dei fleste kundane har teke det bra. Juklafjord skulle opna no i mai, men opninga er utsett til juni, seier Bakke.

– Så me har verkeleg fått kjenna på koronakrisa, men samtidig har me eit større perspektiv på dette. At folk er friske og at samfunnet fungerer, er viktigare enn å kosa seg på Folgefonna og i Jondal.

Det vert nok langt mindre omsetning i år. Bakke og folka hans har jobba systematisk for å kutta kostnader.

– Me skal nok koma oss gjennom dette, og håpar på å tena pengar i år òg. Korleis sesongen vert, er avhengig av korleis pandemien utviklar seg, og sjølvsagt kor mange nordmenn som vel å leggja ferien til Hardanger, Jondal og Folgefonna, seier Bakke.

– Det kan koma ein ny smittetopp og restriksjonar igjen. Me må gjera vårt for å sørgja for godt smittevern og at alle kundane kjenner seg trygge på Juklafjord og breen, seier Bakke.

– Me har justert ned budsjettet til om lag 50 prosent av normal omsetning både på breen og på Juklafjord. Dette inneber at det må koma fleire nordmenn enn vanleg dei siste åra, seier den daglege leiaren.

Byggjer merkevare

Normalt stoppar 30.000 turistar i Jondal i månadene mai–september. Bakke håpar å fanga opp fleire av desse.

– Me byggjer merkevara Glacier Road, opplevinga av å køyra frå fjorden til breen. Det vert kajakkturar på fjorden, fantastiske fjell- og sykkelturar, og ikkje minst ski, snøbrett og breturar på Folgefonna, seier Bakke.

– No får me òg ein fantastisk restaurant i det nye velkomstsenteret ved breen, noko som gjer at å køyre Glacier Road er freistande for langt fleire, trur me. Køyrer du Oslo–Bergen, er det absolutt verdt ein liten avstikkar å eta middag ved brekanten 1.200 meter over havet! seier Bakke.

Folk kjem til Jondal for å oppleva fjorden, folket, fjella og breen. Ein annan viktig ting er at Jondal framleis er ei ekte fjordbygd og ikkje ei typisk turistmaskin som til dømes Geiranger, Flåm og Eidfjord, meiner Bakke.

– Dette må me klara å bevara, og me jobbar etter verdiane «ekte, berekraftig og verdiskapande». Me må klara å tena pengar på turistane utan å få overturisme. Det er ikkje berekraftig og er negativt for dei fastbuande. Opplevinga av stille ved fjorden, på fjellet og på breen er ei eksklusiv oppleving i seg sjølv, fortel Bakke.

Planen for reiselivet med tanke på vekst er å tena meir på dagens volum i sommarmånadene, og få auka omsetning i skuldersesongane. Jondal skal vera ein god plass å bu og ein fantastisk plass å oppleva som turist.

– Dette jobbar me for å halda oppe og utvikla gjennom statusen som nasjonalparklandsby, seier Bakke.

– Vil finna andre vegar

Iversen trur folk vil køyra alternative vegar for å koma til Jondal når ferjesambandet er stengt, og kjem til å leggja ut orientering om desse på nettstaden til selskapet.

Ein del gjester kjem frå Austlandet. Dei er ikkje påverka, men det vert dei som reiser frå bergensområdet. Dei må eventuelt køyra om Gjermundshamn, og får ein lengre tur enn normalt.

Om lag seks personar er tilsette i heisen i sesongen, i tillegg til eit par i kafeen og restauranten som kjem. Senteret har om lag femten tilsette i løpet av sesongen. Visitfonna har hatt ein roleg start i år, og fekk opna fyrst 3. mai på grunn av koronaviruset pluss dårleg vêr.

Skisenteret må framleis ta omsyn til smittevern, men tingingane ser greie ut, fortel Iversen.

Landslag kjem på besøk

Han har mista ein del utanlandske lag, men håpar på ei lette i smittevernreglane slik at ein del World Cup-lag kan koma. Heile det norske herrelandslaget skal trena på fonna, både på utfor, slalåm og storslalåm.

– Det vert spanande å sjå korleis økonomien vert, seier han.

Alpinanlegget har tidlegare hatt kring 25.000 gjester i året. Iversen vonar at mange nordmenn vil feriera i eige land i år. Pågangen i bestillingar er svært god, seier han. Han trur mange vil koma på grunn av det nye velkomstsenteret.

Noko arbeid innvendig står att før senteret er heilt ferdig. Iversen håpar på å få opna 19.–20. juni.