Ferjer er berga – turistbåten er enno utsett
Ferjekutta er kutta ut or det fylkeskommunale budsjettet, medan turistbåten framleis står i fare.
Sist veke vart det kjent at fylkesdirektør Rune Haugsdal i ein ny versjon av budsjettframlegget har stroke tidlegare lanserte ferje- og busskutt i mellom anna Hardanger og Kvinnherad. Bakgrunnen for endringa var ei ekstra løyving til Vestland fylkeskommune i 2025 på 82 millionar kroner i tilleggsproposisjonen til statsbudsjettet.
Dimed vert det framleis mogeleg å ta ferje mellom Kinsarvik og Utne, og det vert framleis to ferjer i sambandet Årsnes–Gjermundshamn. Busstilbodet også på kveldstid vert som før om ikkje politikarane vel å reversera reverseringa av kutta.
Det kuttet som derimot ikkje er kutta i det nye framlegget, er løyvinga på fire millionar kroner til drift av turistbåtruta på Hardangerfjorden.
Både Ullensvang kommune, Kvam herad og Hardangerrådet tok nyleg til motmæle. Dei protesterte mot både dei allereie strokne ferjekutta og mot å fjerna turistbåten.
Hardangerrådet, som drøfta saka i eit møte i Odda 8. november, vedtok ei fråsegn som framhevar rolla til båten «demokratisk» som både bindeledd mellom bygdene i Hardanger og reiselivstilbod. Båten er dessutan viktig for satsinga på heilårsturisme, påpeikar rådet.
– Det er avgjerande å sikra drift, då bortfall vil ha omfattande negative konsekvensar for reiselivsnæringa. Mange enkeltståande næringsaktørar er avhengige av produkta bygde opp rundt båtruta, skriv rådet.
Sigrid Brattabø Handegard (Sp) i fylkestinget opplyser at forhandlingane mellom samarbeidspartia i det fylkespolitiske fleirtalet er i gang. Ho kan ikkje seia noko om lagnaden til turistbåten enno.
