Ferjekutt: – Hardanger taper mest

Vestland fylkeskommune bruker for mykje pengar på drift av kollektivtransport.

Utgiftene aukar, og tilskot frå staten held ikkje tritt, ifølgje fylkesdirektør Rune Haugsdal.

Derfor foreslår fylkeskommunen å finna fram sparekniven til neste års budsjett. For Hardanger inneber forslaga kutt i fleire båt- og ferjetilbod:

• Avvikla yting til turistbåten Hardanger

• Kutte ei av to ferjer på sambandet Gjermundshavn–Varaldsøy–Årsnes

• Innstille sambandet Kinsarvik–Utne

Les også:

Vil vera eit stort tap

Andreas Skogseth i Visit Hardangerfjord meiner at Hardanger er regionen som kjem dårlegast ut i forslaget frå fylkesdirektøren.

Ikkje minst vil turistbåten vera eit stort tap, meiner han.

– Den er kritisk for turistnæringa i Hardanger, og også viktig som eit reisetilbod for alle som bur i bygdene langs fjorden. Den knyter regionen saman.

Skogseth peiker på at Hardanger er blant regionane i Noreg med størst prosentvis auke i turisme.

I og med at bilvegane kjem under stadig meir press, meiner han at ein burde satsa båtvegen.

– Turistane kjem trass alt for å oppleva fjorden.

Kinesarane forsvann

Turistbåten, som blir drifta av Norled AS, køyrer dagleg mellom Norheimsund og Eidfjord i perioden frå mai til september.

Men turistbåten har ikkje makta å finansiera drifta med billettinntekter åleine. Fylkeskommunen og kommunane har årleg spytta inn fire millionar kvar.

– Betyr ikkje det at marknaden ikkje er stor nok til at det er liv laga?

– I 2019 var prognosane veldig gode, men så kom pandemien. Turistane forsvann, særleg dei kinesiske, som utgjorde den største marknaden, seier Skogseth.

Dei siste par åra har aktiviteten tatt seg kraftig opp igjen, ifølgje Skogseth.

– Me har vore overtydde om at turistbåten vil bli lønsam over tid, seier han.

– Vil det ikkje då vera ei grei sak å få finansiering til drift andre stader enn frå fylkeskommunen?

– Ei heilt kommersiell drift vil sannsynligvis gjera båtruta om til ein enkel rundtur for turistar i Bergen, rigga for dagsturar. Me vil behalda turisten i Hardanger lenger, seier Skogseth.

– Fylkeskommunen og kommunane må vera med og leggja til rette for kva turisme me skal ha. Her speler turistbåten ei viktig rolle.

– Ville vore krise

Timo Knoch (Ap) , ordførar i Eidfjord, vil også veldig gjerne behalda turistbåten som i dag.

– Den er veldig viktig for næringslivet i kommunen. Natursenteret, for eksempel, får mykje trafikk frå båten, seier han.

Knoch er også rådsordførar i Hardangerrådet. Han seier at rådet kjem til å koma med ei felles fråsegn om ferjekutta. Kva fråsegna kjem til å innehalda, vil han ikkje forskotera.

– Eg har ikkje snakka med dei andre ordførarane enno. Men det ville vore krise for Ullensvang om Kinsarvik–Utne blei lagd ned, seier Knoch.

Om rådet kjem til å kjempa for Gjermundshamna–Årsnes, er meir usikkert, sidan Kvinnherad ikkje er del av Hardangerrådet.

Sjølv om Knoch håper å kunna hindra kutt, seier han at ein likevel må vera realistisk.

– Eg trur me må vera løysingsorienterte. Det er ikkje nødvendigvis slik at me kan behalda alt slik det har vore, når fylkeskommunen må spara så mykje. For oss handlar det om å finna ut av kva endringar som er akseptable.

Dyrare bussbillettar?

Andreas Skogseth forstår at fylkeskommunen må gjera tøffe val, men han stussar over prioriteringane.

Samtidig som kutta kjem, påpeiker han at ein bussbillett frå Bergen til Odda kostar dryge 100 kroner, noko han meiner kanskje er i overkant rimeleg for alle turistane som skal til Trolltunga.

– Kunne det ikkje vore meir pengar å tena her for fylkeskommunen? Me vil vel at turistane skal leggja igjen pengar? Spør Skogseth retorisk.

Skogseth har ikkje gitt opp turistbåten enno, men han byrjar å få dårleg tid.

Fylkebudsjettet for neste år skal bli endeleg vedtatt 11. desember.