Jondalsferja vart innstilt

Ferjesambandet Tørvikbygd–Jondal vart fredag ettermiddag innstilt inntil vidare på grunn av problem med ei ferjebru.

Det opplyste Fjord1 på vegner av Skyss i ei driftsmelding fredag ettermiddag. Innstillinga skuldast vanskar med ferjebrua i Tørvikbygd. Søk etter feil gjekk føre seg.

Like før klokka 19 opplyste Fjord1 at MF «Samlafjord» kom til å ta opp att ruta frå klokka 19.20. Ferje 2 vart innstilt ut dagen.

– Det vert normal drift i sambandet laurdag, opplyste Fjord1 klokka 20.30.

HF fekk om lag klokka 16.15 opplyst av ein billettør på kaien i Tørvikbygd at det såg ut til at sambandet truleg ville verta stengt minst til laurdag morgon. Det vart då arbeidd på staden.

Fredag morgon vart ferje 2 innstilt. Regionleiar Tor Kristoffersen i Fjord1 opplyste til HF at MF «Lifjord» var på veg ut fjorden til sambandet Jektevik–Nordhuglo–Hodnanes. Ferja skulle gå inn i det sambandet om lag klokka 12.

– Så er det planlagt å få ferja tilbake i løpet av dagen, men ferja som opphavleg går i det sambandet, må reparerast fyrst, sa Kristoffersen.

Den tilsvarande helga i fjor var ordninga med ekstraferje avslutta, og det vart lange køar og problem i samband med festivalen Dyrsku’n i Seljord. Festivalen går av stabelen igjen komande helg. Årets sommarferjesesong vart flytta nettopp av omsyn til festivaltrafikken.

– Har Fjord1 teke festivalhelga med i vurderingane?

– Nei, men det er teke med at me har eit anna samband som ikkje har ferje i heile teke. Så får me håpa at ferja kjem attende i løpet av ettermiddagen. Me må berre finna ut av det fyrst, seier Kristoffersen.

Ferje 1 – MF «Samlafjord» – går i utgangspunktet som normalt. Men klokka 13.09 melde Fjord1 at problem med ei ferjebru kunne føra til seinkingar. Noko seinare kom meldinga om innstilling av heile sambandet.