Ferierer helst i Noreg
Kvar kan ein feriera i desse koronatider? Fem kvemmingar og to ullensvangarar fortel kva dei skal i sommar.
Øyhopping i Solund
Båtbyggjar Peter Helland-Hansen skal feriera litt ulike stader i år — «i Noreg, sjølvsagt», seier han.
Rennesøy utanfor Stavanger i Rogaland vert den fyrste staden. Så vil han opphalda seg ei tid i Nordfjord, og kanskje på Hardangervidda og Haugastøl. Der skal han leva hytte- og friluftslivet, fiska og gå fjellturar. Helland-Hansen skal òg til Solund, der han skal ro og møta vener og familie. Øyhopping med robåt i Solund er det han gler seg mest til.
Båtbyggjaren likar elles å ha fridom og opne planar.
Får besøk av familie
Heradsstyremedlem i Kvam, Hans Arne Børsheim (KrF), skal òg feriera i Noreg, nærare bestemt heime i Strandebarm. Han skal slappa av og jobba rundt huset med måling og rydding med meir. Han har ikkje planar om dei store turane, men vil gå fjellturar og bada. Det vert òg småturar i nærmiljøet og bergensområdet. Han ser mest fram til å vera i lag med familien, og ventar besøk av ein son, svigerdotter og barneborn.
— Det er kjempekjekt og ein «høydare», seier han.
Elles vil Børsheim nyta livet og kosa seg.
Steppar inn som ordførar
Varaordførar Frode Nygård (Frp) skal fungera som ordførar i Kvam i 14 dagar i sommar.
Elles vert han heime og i fjellet i Kvam og kanskje litt på Hardangervidda. Der skal han fiska, og ikkje så mykje meir. Nygård pleier fanga så mykje fisk at han klarar seg, fortel han. Det Nygård gler seg mest til, er å slappa av og gjera litt andre ting enn vanleg.
På jobb for Lingalaks
AUF-leiar i Kvam, Håvard Botnen, skal jobba tre veker hjå Lingalaks AS i sommar. Etterpå reiser han ut og mønstrar på eit skuleskip, den danske 3-masta fullriggaren «Georg Stage». Botnen skal vera om bord fram til desember. Han kjem ikkje til å ha tilgang til telefon eller e-post om bord. Det vil difor verta utnemnd ein ny leiar av Kvam AUF.
Gler seg til å ha fri
Rådmann i Ullensvang kommune, Ole-Jørgen Jondahl, seier han har vore så frimodig og lagt ei ferieveke til Danmark etter at landet vart opna for reiser for nordmenn. Resten av ferien vert i Noreg og lokalt heime.
I Danmark vert det litt farting, og han skal innom Ålborg, Århus og København.
Lokalt satsar han på å nytta fjellet når snøen trekkjer seg tilbake. Så skal han måla eit hus og setja opp eit par levegger. Det blir litt arbeidssommar òg, fortel Jondahl.
– Eg gler meg til å ha fri. Det har vore ein travel og krevjande vår, både med kommunesamanslåing og at me kom opp i koronapandemien. Så no skal det verta godt med nokre friveker.
Jondahl var med på opningsturen av siderbåten i Sørfjorden, og den har han tenkt til å ta ein gong til i sommar. Det er eit tips til lokalt ferierande, legg han til. MS «Vision of the Fjords» går frå Odda via Aga og Lofthus med sidersmaking, lokal mat og lokale historier.
Nyt natur og kultur
Leiar for barnehage og skule i Kvam, Beate Gauden, skal feriera i Hardanger, i Sogn og på Sørlandet. Ho skal hovudsakleg gå fjellturar og kanskje besøkja nokre heilt nye stader. Ho planlegg å bu på det gamle hotellet Walaker i Solvorn i Sogn og på Håheim gard i Fusa. Gauden planlegg å gjera ting som ho ikkje har gjort før, i nærområdet. Det er Vestland ho fyrst og fremst skal utforska.
Ho gler seg til å sjå nye stader og nyta fjell og strand og natur. Ho ser òg fram til å nyta kultur på dei nye plassane. Men mest handlar det om naturopplevingar. Gauden gler seg mest til å bada i eit fjellvatn.
