Ferdige med helsepersonell denne veka
Men kor lang tid det tek før alle som vil ha vaksine, har fått han, veit ikkje rådmannen.
Rådmann Ole-Jørgen Jondahl måtte i kommunestyremøtet onsdag svara på ei rekkje spørsmål frå Terje Kollbotn (R) om status i vaksinasjonen i Ullensvang.
Han opplyser at alle i institusjonar og tilsvarande tilbod som har takka ja, har fått vaksinen. Onsdag stod om lag 35 tilsette i helse og omsorg att å vaksinera, men rådmannen rekna med at dei fleste ville vera ferdige denne veka. Denne gruppa omfattar også mellom andre tannlegar, apotektilsette og augelegar.
Jondahl opplyste at alle over 75 å skal vera vaksinerte før mai, og at innbyggjarar mellom 18 og 64 år med særleg høg risiko har fått den fyrste av dei to vaksinedosane som er turvande. Kommunen er i ferd med å vaksinera dei mellom 65 og 74 år, og reknar med å vera ferdig med desse i midten av mai om tempoet held fram som til no.
Kollbotn ville vita kor mange som kan vera vaksinerte før 1. juli. Det kunne ikkje rådmannen svara på, all den tid kommunane berre veit kor mange dosar dei får komande veke. I Ullensvang er 492 dosar venta komande veke.
Ifylgje Jondahl har tilgangen på frivillige vore god så langt. Dersom vaksineleveransane vert større, vil kommunen vera på jakt etter fleire.
— Det er berre å melda seg, sa han.
