– Fengselsprega fasade og uteplass

Utval for kultur og levekår i Ullensvang kommune var på synfaring på skulen tysdag. Rektor Sarah Marie Røstbø møtte politikarane med ein presentasjon av skulen og ei omvising både inne og ute.

Skulen har nye fasilitetar med grupperom til alle klasserom, symjehall, multihall, sløyd, naturfagrom og skulekjøken. Men skuleplassen, dekt med asfalt og grus, imponerte ikkje politikarane.

Uteskuleområdet er fint, fortalde rektor til politikarane. Småtrinnet har uteskule éin gong i veka, medan mellomtrinnet har det annakvar veke. Då er borna ute i nærområdet, til dømes i skogen og ved sjøen. Det er òg fine plassar å gå fjellturar, fortalde Røstbø. Det står i stor kontrast til skuleplassen.

– Skulen har ein fengselsprega fasade og uteplass, seier Oppedal etter ein spasertur over asfalten.

– Det er veldig fint inne, men uteområdet har stort forbetringspotensial, seier utvalsleiar Marit Jensen Måkestad (Ap).

– Ingen «quick fix»

Rektor seier at prosessen med å fornya uteområdet til skulen har teke lenger tid enn det skulle. Ho håpar at alt kan vera klart om halvanna år. Skissa har, ifylgje Røstbø, vore klar i to år. Kostnadane har meir enn dobla seg i forhold til kalkylen som vart lagd fram då, seier ho. Difor er arbeidet med ein ny kalkyle i gang. Rektoren trur kostnadane vil verta 10–12 millionar kroner.

– Det er ingen «quick fix», og det kan henda det tek tid før alt er på plass. Det kjem an på kva økonomi me har. Dette er eit nærmiljøanlegg og me kan difor søkja om meir midlar. Me oppfordrar lag og organisasjonar til å søkja om pengar til utstyr og apparat, seier Røstbø.

Det er ikkje berre det synlege på skuleplassen som må ordnast.

– Mykje av arbeidet er under bakken, fordi me slit med overvatn når bakken ikkje klarar å ta unna alt når det regnar, så me må få dreneringa i orden fyrst, seier Røstbø.

Sidan skulen har elevar frå 1. til 10. klasse, trengst meir variasjon, seier rektoren. Det finst mykje areal, men det må utnyttast betre, seier ho. Ut frå dei førebelse planane skal området framføre skulen tilretteleggjast for dei eldste elevane. Området er veldig sterilt med kvitt bygg og lite farge, så det skal brytast opp med grøne oasar og ei basketballkorg, fortalde ho.

Dei yngste skal etter planen vera i området bak skulen. Der skal det mellom anna bli ein jungel med ulike leikeapparat, ifylgje Røstbø.

Ikkje lenger parkeringsplass

Det skjer mykje i skuleområdet utanom skuletida. Då vert skuleplassen ofte nytta som parkeringsplass. Det vil det verta slutt på om skissene vert realiserte.

– Planen er å ha ein bom for å stengja av skuleområdet. Born og bilar høyrer ikkje saman. Men det skal vera mogleg å opna han for å få plass til nokre bilar ved store arrangement, sa Røstbø.

Røstbø er nøgd med dei nye bygga på skulen, og ser fram til at skuleplassen skal stå i stil med resten.

– Me har venta lenge på dette her, men så lenge me veit at det kjem, så er me veldig glade for oppgraderinga, seier Røstbø til HF.

Sjå korleis rektoren skildrar skuleområdet og dei nye planane her: