Fem avvik i omsorgsbustader
Det vart avdekt manglande dokumentasjon under eit branntilsyn i Ålvik.
Tilsynet vart utført av Kvam brann og redning i juni. Fire av dei fem avvika gjekk ut på manglande dokumentasjon. Eigar hadde ikkje gjeve brukarane nok kunnskap og informasjon om installasjonar som skal oppdaga brann eller avgrensa konsekvensane. Eigar mangla også dokumentasjon på gjennomførte kontrollar av sprinklaranlegget.
Brukar av bygget mangla dokumentasjon av brannøving og brannvernopplæring, og kunne heller ikkje dokumentera risikovurderingar.
Avvika må følgjast opp i ei skriftleg tilbakemelding innan 1. desember. Framdriftsplanen må seia korleis avvika skal rettast opp, kven som har ansvaret og når dei skal vera i orden.
Arne Johan Heggland, byggjeleiar i Kvam herad, sende inn dokumentasjon for sprinklaranlegget 22. oktober.
– Ein kan ikkje sjå at det i detaljprosjekteringa eller i brannkonsept er stilt krav om røykventilasjon. Ein har såleis heller ikkje lukkast med å finna dokumentasjon på det, skriv han i brevet.
