— Fekk tre over seg
Ein mann vart send til Haukeland universitetssjukehus etter ei ulukke i samband med skogsarbeid på Ljones torsdag ettermiddag.
Då mannen skulle saga ned eit tre, fekk han det over den nedste delen av kroppen og vart liggjande fastklemd. Mannen ringde nokon etter hjelp, som igjen ringde etter naudetatane. Det opplyser politioverbetjent Svein Valland Laupsa ved Kvam politistasjon.
Naudetatane fekk den fyrste meldinga klokka 14.50.
Artikkelen held fram under annonsen.
Ulukka skjedde like ved Ljoneselva, mellom Ljonesvågen og Eidesvatnet. Luftambulansen var oppteken, så eit redningshelikopter frå Sola vart sendt til staden.
— Det tok av medisinske grunnar litt tid å frigjera mannen. Helsepersonellet ville ha helikopteret i nærleiken då han vart frigjord, fortel Laupsa.
Klokka 15.57 kom meldinga om at mannen, som heile tida var medviten, var frigjord. Laupsa opplyser at luftambulansen, som var oppteken med eit anna oppdrag, landa på staden for å vera med på å stabilisera den skadde.
— Sidan det allereie var ein annan om bord i luftambulansen, måtte redningshelikopteret fly den skadde til Haukeland universitetssjukehus, seier politioverbetjenten.
Saka vert ikkje undersøkt vidare av politiet.
