Fekk stor kontrakt i Rosendal
Fuglafjell AS utvidar det geografiske nedslagsfeltet. Verksemda har vunne konkurransen om å byggja omsorgsbustader i Rosendal.
Påtroppande dagleg leiar i Fuglefjell AS, Arne Lunestad, fortel at kontrakten har ein verdi på like over 50 millionar kroner. Omsorgsbustadene skal byggjast av Kvinnherad kommune på Heradstun i Rosendal. Bygget skal ha åtte leilegheiter og fasilitetar for dei tilsette.
Lunestad fortel at det er eitt hinder på vegen: Kommunestyret i Kvinnherad må vedta finansieringa av prosjektet. Fuglafjell har fått signal om at saka truleg vert handsama i mars.
– Me kryssar fingrane for at finansieringa går i orden. Gjer den det, vil me byrja byggja i løpet av våren. Arbeidet vil truleg ta om lag eitt år, seier han.
Fuglafjell vart etablert i 2015 som eit samarbeid mellom fire lokale verksemder.
– Fuglafjell vart oppretta fordi dei kommunale prosjekta vart større og større, og difor vanskelege å gapa over for små, lokale verksemder. Hovudtanken var og er å samla kapasitet og kompetanse, for å kunna konkurrera om dei lokale oppdraga, fortel Lunestad.
Fuglafjell har mellom anna bygd fire barnehagar og Strandebarm omsorg i Kvam. Fuglafjell har også bygd ny idrettsfløy og undervisningslokale til Voss ungdomsskule. Omsorgsbustadene er det første prosjektet verksemda har fått i Kvinnherad.
Fuglafjell er i dag eigt av H2 Hardanger AS, Johs. E. Øvsthus AS og Tecno VVS AS. Omsorgsbustadene i Rosendal skal byggjast i samarbeid med kvinnheradverksemdene Byggservice AS og Teigen Bygg & Trelast AS.
– Me ønskjer å byggja vidare på den modellen som vart ein suksess i Kvam. Då var det naturleg å samarbeida med solide lokale verksemder, seier Lunestad.
