Fekk sterk kritikk for tunnelinnspel
Då fylkeskommunen lanserte eit nytt tunnelinnslag i Steinsdalen i fjor haust, protesterte ikkje byråkratane i Kvam. No får dei refs.
På den såkalla kontordagen 24. august i fjor kom det for ein dag at fylkeskommunen framleis vurderte fleire andre alternativ til tunnelinnslaget enn det som er vist i den vedtekne kommunedelplanen.
I september vart administrasjonen beden om å meina noko om dei ulike alternativa. Saka vart då teken opp både i trafikksikringsgruppa, i eining for plan og byggjesak og i leiargruppa i Kvam herad. Rådmannen protesterte ikkje mot alternativet som seinare er valt av fylkeskommunen, vel å merka med atterhald om at ein hadde fått all relevant informasjon.
Alternativet vil råka fleire bruk og bustader på Skeie.
– Oppsiktsvekkjande
Dei manglande innvendingane frå rådmannen fekk merksemd i formannskapsmøtet 25. januar, der leiar for eining for plan og byggjesak, Heidi E. Ørjansen, orienterte om planprosessen.
Ikkje minst varaordførar Frode Nygård (Frp) reagerte sterkt på at rådmannen ikkje streta imot då alternativ som ikkje har hatt politisk støtte tidlegare i prosessen, og som har vore frårådde av fylkeskommunen sjølv, brått kom på bordet att.
– Det er oppsiktsvekkjande at vår eigen administrasjon har fått innblikk i alternativ som strid så klart med kommunedelplanen allereie i september, ut frå at me har hatt ein ganske omfattande politisk prosess for å koma fram til innslaget som vart vedteke, sa Nygård.
Han meiner endringa er så radikal at det burde ha vore ein større prosess kring henne. Etter hans syn har fylkeskommunen mista truverd i saka og medverknaden spora heilt av. Dei råka grunneigarane kjenner seg overkøyrde, hevda han.
– Mange møtte aldri opp på kontordagen fordi dei trudde alternativet forbi Lid Jarnindustri var det kontordagen handla om, sa han.
– Synest seint
Gjermund Stuve (Sp) slutta seg til kritikken. Han synest det er trist at det nye innslaget vil råka fleire eigedomar og dyrka mark.
– Valet er forholdsvis drastisk, sa han, og etterlyste argument mot rundkøyringa.
Ordførar Torgeir Næss (Ap) synest ikkje handlemåten til administrasjonen i saka er uproblematisk. Han viste til at det ikkje har vore mogeleg å koma med innspel om det nye innslaget, utover at det vart vist som eitt av fleire alternativ på kontordagen. Han har fått vita at sjansen til å koma med innspel er når planen kjem på høyring.
– Det synest seint, i og med at me har vedteke ein kommunedelplan. Då tenkjer eg: «Kvifor gjorde me det?» sa Næss.
Rådmann Anita Hesthamar meiner responsen frå Kvam herad kan ha noko med måten alternativa vart presenterte på av fylkeskommunen. Ho forsikra om det ikkje var nokon jubel i byråkratiet for at det opphavlege alternativet ovanfor Lid Jarnindustri ikkje kan realiserast. Og heradet kan ha trudd at det nye innslaget har vore formidla meir til dei råka partane enn det har vist seg å vera, sa ho.
– Dette er eit fyrste innspel, og ikkje noko dei kan ha lagt vekt på, med alle mogelege atterhald. Det me såg det ut frå, er det som tidlegare er signalisert om trafikkforhold, trafikkavvikling, Lid Jarnindustri og gang- og sykkelveg. Administrasjonen har ikkje handsama planen enno. Me har ikkje sagt at dette er det me tilrår. Det er ikkje noko som ikkje har konsekvensar. Så må ein vurdera dei opp mot einannan, sa ho.
Ho viste til at planen kjem til formell handsaming seinare.
Argument mot
I eit fylkeskommunalt dokument datert 17. november er det tidlegare valde tunnelinnslaget ovanfor industriverksemda vurdert, saman med det seinare tilrådde innslaget og ei tredje løysing med rundkøyring. Rundkøyringa i dette alternativet er vel å merka ikkje plassert der det har kome innspel frå lokalbefolkninga om å plassera henne. Ho vil fjerna eitt bustadhus, medan den lokalt føreslegne kanskje ikkje råkar nokon.
Konklusjonen til fylkeskommunen – ut frå faktorar som mellom anna landskap, natur, tryggleik, anleggsarbeid, geoteknikk, støy og kostnad – er at det tilrådde alternativet er det klart beste.
I vurderinga av alternativa er det særleg framheva at rundkøyringa vil gjera framkoma for tunge køyretøy dårlegare, og at det er unaturleg med ei rundkøyring sidan det ikkje er større, viktige vegar som vert kopla saman. Tiltaket vert «berre ein funksjon for å komme seg meir vinkelrett på fjellet og for å unngå tap av busetnader ved Lid, og vil føra til dårlegare og mindre effektiv framkome på fylkesvegen», skriv fylkeskommunen. Vidare vert det vist til at det ikkje er andre rundkøyringar mellom Frølandsvatnet og Norheimsund.
– Har gått fint
Nygård er kritisk også til desse vurderingane. Han minte om at det er planlagt ei rundkøyring på Mo i Steinsdalen, og at det er ei rundkøyring ved Børvenestunnelen med avkøyrsler til kommunal vegar.
– Det har gått heilt fint og ikkje vore eit ulukkespunkt. Dette viser vrangvilje frå dei som utarbeider planen, sa Nygård.
I tillegg, seier han til HF, meiner han at nyare store køyretøy kjem seg raskt opp i fart. Stiginga på nær tre prosent frå rundkøyringa til tunnelmunninga vil såleis ikkje vera så problematisk som fylkeskommunen vil ha det til, meiner han.
Det valde tunnelinnslaget er som nemnt ikkje i samsvar med kartet i den vedtekne kommunedelplanen. Ifylgje Ørjansen opnar føresegnene i planen for endringar dersom det kjem fram nye tilhøve som ikkje har vore kjende. Det har skjedd her, ettersom ulike tilhøve, ikkje minst grunnforholda, gjer den vedtekne løysinga krevjande. Løysinga er så komplisert at anleggsarbeidet kan koma til å ta fem år dersom ein vel denne løysinga, opplyste Ørjansen.
Nygård viste til at kommunedelplanen slår fast at reguleringa skal skje innanfor den vedtekne plangrensa i kommunedelplanen. Ørjansen minte om at dette står i retningslinene, som i motsetnad til føresegner ikkje er juridisk bindande.
Reguleringsplanen for tunnelen kan vera klar til sommaren og kanskje vedteken før året er omme. Det største hinderet – finansiering av tiltaket – står enno att. I vurderinga av alternativa i haust er kostnaden stipulert til nær 2,5 milliardar kroner.
