Fekk spela mot eldre

Ifylgje hjelpetrenar for U15-laget, Kjetil Nyland, stilte Rossvoll Volleyballklubb med 2 gutelag og 1 jentelag på seriedagen i Øystesehallen.

I løpet av sesongen frå oktober til mars vert det arrangert 6 turneringar. 2 av dei har Rossvoll Volleyballklubb ansvaret for å arrangera. I helga deltok lag frå Sveio og frå bergensområdet. 12 jentelag og 8 gutelag spela kampar. Jentene spela i Norheimsund og gutane spela i Øystese.

Det eine Rossvoll-laget hadde gutar frå 7. klasse, medan det andre gutelaget bestod av 9.-klassingar. Totalt var 12 gutar og 5 jenter frå volleyballklubben i aksjon.

– Vanlegvis er det berre ungdomsskuleelevar som spelar på desse seriedagane. Det yngste laget vårt fekk spela mot eldre lag, og fekk testa seg godt, seier Nyland.

– Viste framgang

Sjølv om det ikkje vart siger i nokon av dei fem kampane for dei yngste, såg hjelpetrenaren progresjon.

– Mange av dei har berre delteke på treningar, og fekk spela sine fyrste kampar i helga. Dei viste framgang utover dagen og spela betre saman, seier Nyland.

Strandebarm Volleyballklubb deltok med 20 spelarar frå 6. til 10. klasse. 10 jenter spela 4 kampar i Norheimsund. I Øystese bestod laget av 6 gutar og 4 jenter. Trenar Siv Øygard fortel at mange spela med seksmannslag for fyrste gong. Dei yngste har berre vore med på miniturneringar med færre spelarar på laget tidlegare, seier ho.

– Det er veldig bra at så mange er med. Me førebudde spelarane på å ta kampane som trening, og at det ikkje er så farleg om me tapar, seier Øygard.

Begge laga vann éin kamp. Ifylgje Øygard hadde spelarane hatt det kjekt.

– Kjekt at me vert fleire

9.-klassegutane frå Rossvoll vann 2 av dei 5 kampane sine. Jentelaget til Rossvoll fekk låna spelarar frå Strandebarm for å fylla laget til sine kampar, seier leiar i Rossvoll Volleyballklubb, Eilev Nyland.

Til helga er det kamp på heimebane for seniorane til Rossvoll. Spelarane møter elitelaget frå Tromsø. Då nyttar gutane på U15-laget sjansen til å ha ein volleyball-laurdag, seier Nyland.

– I tillegg til å sjå kampen vert det trening og sosialt samvær. Me ynskjer å byggja lagkjensle og gjera ting saman, seier Eilev.

Han synest det er gledeleg at fleire vel å spela volleyball.

– Det var ei mindre gruppe før. Me ser at fleire kjem til etter at fotballsesongen er over. Det er kjekt at me vert fleire, seier Eilev.