Fekk smaka på arbeidslivet

Elevane fekk slik ein smak på arbeidslivet og erfaring i yrket dei sjølv valde.

Aleksander Nicholas Nordlinder Nitter og Sondre Fagerheim Lunestad var på Norheimsund skule. Der har dei hjelpt elevar med arbeid, vore med i friminutt og vore på skulefritidsordninga.

Aleksander seier det er kjekt i friminutta med dei mindre elevane som er merksame på 9.-klasseelevane. Sondre seier han ikkje har kjeda seg og at han fekk ein pratsam og fin klasse. Han er svært positiv til konseptet med ei veke i arbeidslivet.

Elevane seier dei har fått eit innblikk i vaksenlivet og yrket til lærarane.

– Samtidig som det er ein krevjande jobb, ser eg at dei kosar seg, seier Sondre.

Nathalie Lyssand og Tuva Bystøl Børve har jobba på Hardangerfjord Hotel. Der har dei rydda tallerkenar og hjelpt til med turgrupper som er gjester.

Jentene seier at arbeidsveka var veldig annleis enn ein vanleg skuledag. Dei har sprunge rundt, vaska, hjelpt til og snakka med gjester i staden for å sitja framfor ein pult. Den varierte arbeidsdagen har vore tung, og Tuva seier at det mest keisame var å rydda vekk tallerkenar etter måltid. Ho er veldig positiv til arbeidsveka og kunne lett tenkt seg å arbeida fast på hotellet.

– Det er ganske tøft, men det går viss du har motivasjon, seier Nathalie.

Lisbeth Mariechen Lingener har reist heilt til Oslo på teaterfestivalen Oslo Ung, Noregs største teaterfestival for born og unge. Der har ho hjelpt skodespelarane, sett generalprøvar og fått eit generelt innblikk i teaterverda.

Lisbeth liker sjølv teater og har vore med på dei store juleframsyningane i Kvam. I Oslo har ho òg fylgt såkalla inspisientar som hjelper skodespelarane med å halda styr på kvar og når dei skal vera på plass.

Alle elevane som HF har snakka med, er positive til arbeidsveka.

– Eg oppfordrar dykk til å ta dykk tid til å tenkja på kva de skal i arbeidsveka, seier Aleksander til elevane som skal velja yrke seinare år.

HF gjer merksam på at artikkelforfattarane sjølve har hatt arbeidsveke i HF. Red.