Fekk sju lam i 2021
Kva som har føregått i fjellet i sommar, er det liten tvil om.
Søya kom heim som vanleg under sauesankinga i september, men nemnde då ingenting om kva som hadde gått føre seg i «ferien». Det kom fyrst for ein dag då ho skulle parast med vêren eit par månader seinare.
Den bulande haustvomma tala for seg, fortel matmor Sigrun Johanna Gangdel på Torsnes. Saman med Alf Bendik Gangdal driv ho småbruk med 20 vinterfôra sauer ved Øyjordsneset på Torsnes.
22. desember kom det synlege resultatet av dei sommarlege eskapadane. Søya måtte ha dyrlegehjelp frå Kvam, men hjelpa rakk ikkje fram med ferja om morgonen før det var for seint for det fyrste lammet. Dei to syskena, eit svart og eit kvitt lam, overlevde, fortel Sigrun.
Den same søya sette i vår fire ullkledde nykomlingar til verda. To av dei døydde. Samla fekk ho med andre ord fått sju ungar i fjor, der fire overlevde. Den prestasjonen kan dei færraste tikker skryta på seg.
– Det har eg aldri opplevd i mine 41 år her, seier Gangdal, som opphavleg kjem frå Sogn.
Lamma har vakse godt i vel fire veker og funne seg til rette i den gamle sauefjøsen på Torsnes. Dei er godt i gang med å eta av silohøyet, fortel Gangdal. Ho reknar med å halda syskena inne om lag til 1. mai. Dei har enno ikkje vore utandørs etter fødselen; til det er det både for surt og for skrint med føde.
Kven faren til duoen er? Om han er lite kjent, anna enn at etterkomarane har fått utegangargenar attåt eigenskapane til blandingssauene på Torsnes. Matmor har sine mistankar, men dristar seg ikkje til å spekulera offentleg i slike privatsaker. Det ho veit, er at søya oppheldt seg i fjellområda kring Fjellstøl, sør for Jondal.
