Fekk samfunnsstraff for å ha sett fyr på bosdunkar

Det kjem fram i ein dom frå i Hordaland tingrett.

Det var i november 2020 at naudetatane rykte ut til branntilløp i tre bosdunkar i Strandebarm. Det oppstod skadar på to lysmaster og eit kabelskap i tillegg til bosdunkane. Kostnaden med reparasjonane enda på over 100.000 kroner.

Ifylgje dommen har ikkje mannen erkjent dei faktiske forholda, ettersom han ikkje hugsar dei. Basert på vitneforklaringar finn retten det likevel bevist at mannen har gjort det han vart tiltala for.

I tillegg til eldpåsetjinga er mannen dømd for å ha hatt narkotika og for fleire brot på vegtrafikklova. I dommen står det at han har køyrt for fort to gonger utan gyldig førarkort, og at han ikkje har stoppa for politiet. Mannen har erkjent straffskuld på desse punkta.

Ugjerningane hende i 2020, og «liggjetida» i rettssystemet har kome den dømde til gode i straffeutmålinga. At vedkomande stod i ein vanskeleg situasjon i 2020, og at han ikkje har straffehistorikk utover hendingane, er òg med i vurderinga.

Mannen er dømd til 45 timars samfunnsstraff og lyt betala 1.000 kroner i sakskostnader.