Fekk pris for arbeid med støttekontaktar
Sosionom Kristin Andresen Soldal frå Øystese fekk nyleg ein pris for arbeidet med å styrkja og vidareutvikla støttekontakttenesta nasjonalt.
Prisen heiter Fritid for alle 2021 og vart delt ut av knutepunktet Fritid for alle (FFA) ved Nasjonal kompetanseteneste for born og unge med funksjonsnedsetjingar 28. september.
Soldal er cand.polit og har hovudfag i helsefag. Ho har vore pensjonist sidan 2012.
Prisen heidrar personar som har vore med på å styrkja og vidareutvikla feltet støttekontakt og kultur- og fritidsdeltaking i løpet av dei siste 30 åra.
– Soldal arbeidde i 1980-åra i kring ti år med ansvar for oppfylging av støttekontaktar andsynes personar med ulike behov, føresetnader og ynske. Ho fekk tidleg stor respekt og fasinasjon for det arbeidet som vart utført av ulike hjelparar utan profesjonell bakgrunn, skriv fagjuryen i grunngjevinga.
Soldal såg moglegheiter i støttekontakttenesta, men var kritisk til bruken av betalte støttekontaktar. I 1990-åra fekk ho høve til å prega utviklinga av støttekontakttenesta nasjonalt. Ho engasjerte seg i arbeidet med ein kampanje for rekruttering og opplæring av støttekontaktar.
Kampanjen vart ein del av handlingsplanane til regjeringa for funksjonshemma i tidsrommet 1990 til 1997. Soldal var med og laga eit undervisingsopplegg som vart teke i bruk som valfag i vidaregåande skular i heile landet.
Ho har arbeidd med rekruttering og opplæring av støttekontaktar, og har hatt ein sentral plass i fagmiljøet nasjonalt. Mellom kollegaer går ho under namnet «Mor støttekontakt». Sosionomen gjekk føre og la eit grunnlag for korleis ein skal tenkja om og fylgja opp støttekontaktar. Ho har vore ein pioner i forsking på feltet, og la grunnlaget for den fyrste akademiske vidareutdanninga knytt til feltet støttekontakt, kultur- og fritidsdeltaking. Utdanninga vart organisert i heile landet og i samarbeid med fleire utdanningsinstitusjonar.
Engasjementet hennar og evna til å inspirera andre har vore av stor betydning. Ho tok raskt i bruk digitale løysingar. Den nasjonale konferansen Fritid for alle arrangerte ho i fleire år i Bergen og Oslo.
Fagjuryen har vore oppteken av å finna prisvinnarar som har vore vardar på ein sti fram til dagens tenester for enkeltpersonar og feltet støttekontakt og kultur- og fritidsdeltaking. Soldal er i ein slik samanheng ein verdig vinnar, skriv juryen.
