Fekk nei til skilting

Ullensvang kommune søkte Miljødirektoratet om pengar til skilting i vinter. Kommunen ynskjer å ha skilt ved innfartsårene til kommunen, som informerer trafikantar om at dei kjem inn i ein nasjonalparkkommune.

Ifylgje ein søknad til Vestland fylkeskommune og Statens vegvesen er skilta ynskt plasserte ved Utne ferjekai, Jondal ferjekai, Jondalstunnelen, Folgefonntunnelen og kommunegrensa ved Suldal kommune. Eksakt plassering er ikkje vist til.

Både vegvesenet og fylkeskommunen har avslått søknaden. Reklame og private skilt kan ta merksemda til dei køyrande vekk frå vegen, og dette kan medføra trafikkfarlege situasjonar, meiner fylkeskommunen. Reklamen gjev ikkje relevant informasjon trafikantane treng for å navigera i trafikkbiletet, svara vegvesenet.

Kommunen vart tilrådd heller å plassera den typen skilt på informasjonsplassar langs vegnettet.

I mars klaga kommunen på begge avslaga. I klagen, som er lik til både fylkeskommunen og vegvesenet, skriv Ullensvang at fleire nabokommunar allereie har sett opp tilsvarande skilt.

– I Jondal har me nasjonalparkskilt allereie, som står langs fylkesveg. Desse har lik storleik som dei fem skilta me ynskjer å setje opp i år, skriv Christian Leivestad, rådgjevar i Ullensvang kommune.

Fylkeskommunen har etter klagen bede om meir informasjon om eksakt plassering, medan vegvesenet har informert om at det ikkje låg føre klagerett på avslaget, som var heimla i veglova.