Fekk lov til å rydda i elv
Når eit vassdrag tek seg nytt løp, kan det gamle løpet gjenopprettast av grunneigaren.
Det skriv Noregs vassdrags- og energidirektorat til Magnus Eiken, grunneigar ved Storelvi på Samland i Herand.
Vassressurslova har nemleg særreglar om tiltak som kan gjennomførast utan konsesjon. Arbeidet må gjerast innan tre år etter at skaden oppstod.
Storelvi gjekk stor 11. november, opplyser Eiken i eit straumbrev til NVE. Elva hadde ikkje vore så stor sidan 1953 eller 1954, ifylgje han.
Ho gjorde skade på fundamentet under Samland bru på fylkesveg 550 mellom Jondal og Utne. Tilsette i Mesta AS, Ullensvang kommune og Vestland fylkeskommune kom på synfaring etter nokre dagar. Litt seinare grov Mesta opp lausmassane i elva.
NVE opplyser til HF at det ikkje ligg føre nokon søknad om tiltak hjå NVE i denne saka. Etaten har berre uttalt seg generelt om handsaming av tiltak i vassdrag.
Status i dag er at brufundamentet på Samland-sida er reparert av Mesta, skriv Eiken.
– Elva er ikkje verna, så eg har forstått at eg som grunneigar kan grava så mykje eg vil, berre eg ikkje endrar elveløpet. Eg vil gjerne vita om dette er rett, slik at eg ikkje risikerer å gjera noko feil, skreiv Eiken til etaten.
