Fekk kritikk for tynn bedehusutgreiing

Trongen for å sikra seg husa var for dårleg greidd ut og grunngjeven, meinte fleire då heradsstyret torsdag 14. mars røysta for fullmakta.

Odd Valland Bovim (MDG), som saman med INP var åleine mot å røysta mot henne, meiner at sakspapira ikkje avklarar kva visjonar rådmannen har for eigedomar som i dag er mykje i bruk.

– Eg forstår ikkje heilt kva me skal med bygga. Eg er ikkje sikker på om det er dette me skal prioritera, sa han.

Han minte om at den same rådmannen som no legg opp til å vurdera kostesame huskjøp, i vinter har varsla dystre økonomiske utsikter og sparetiltak.

Les også:

50 millionar

Oddvar Brakestad (H) ottast at kostnaden berre med å sikra seg eigedomane kan verta femti millionar kroner. Også han synest at grunngjevinga i sakspapira er dårleg med tanke på den store kostnaden det kan vera snakk om, og meiner at ordføraren har ein del av ansvaret for å sikra kvaliteten på det som vert lagt fram for dei folkevalde.

– Benkeframlegg i denne storleiken hadde skaka rådmannen. Det er i realiteten eit benkeframlegg rådmannen kjem med, sa Brakestad.

Ordførar Torgeir Næss (Ap) påpeika at saka i denne omgangen berre handla om fullmakt til å tinga, ikkje om sjølve kjøpa.

– Det kan enda med kjøp, påpeika Brakestad.

Bjarte Helland (INP) argumenterte mot fullmakta ved å hevda at heradet frå før har for mykje vedlikehaldsetterslep, og at det ikkje er nokon grunn til å ta på seg endå meir ansvar.

Les også:

– Svar på vedtak

Rådmann Anita Hesthamar påpeika at saka er eit svar på tidlegare politiske vedtak om å sjå nærare på uteområda ved dei to skulane. I Norheimsund er det mangel på bygningsmasse, medan det i Øystese er mangel på uteareal som er det største problemet.

Ho skulle likevel gjerne, sa ho, samstundes ha gjerne sett saka inn i ein større samanheng og i lys av den varsla eigedomsstrategien.

Bjørgulv Hauger (Frp) meiner rådmannen har gjort ein god jobb med saka, og avviste at det er snakk om eit benkeframlegg. Etter hans syn er det viktig å sikra politisk ryggdekning for å gå vidare med tingingar om kjøp, med tanke på kor inngripande kjøp vil vera for seljarane. Han minte om at det er skilnad på å bruka dagens bygg på tomtene og å ta sikte på å byggja nytt.

Ser billegare mogelegskap

Arne Opsahl-Engen (H) meiner det er grunn til å vurdera å løysa inn bustadeigedomar vest for skulen, langs Grovagjelet, for å sikra seg meir plass. Han trur at den løysinga kan verta monaleg billegare enn å kjøpa eit sentralt plassert bedehus. Han minte om at ymse tekniske krav er strengare i ein skule enn i eit bedehus.

Even Øyri (Ap) synest det er synd at politikarane har stilt seg slik at den vidaregåande skulen vil gjera det svært trongt kring barneskulen i Norheimsund. Men når stoda fyrst er slik, er det ifylgje han naudsynt å kartleggja trongen for areal kring skulane.

– Me har eit stort plassproblem. Det lyt me løysa, sa Øyri.

I Øystese vil det – «litt fleipete sagt» – ikkje verta vanskeleg å finna ny plass til både eitt og to bedehus, ettersom lokala til Kvam vidaregåande skule snart vil stå tomme, påpeika Ap-gruppeleiaren.